امت نیوز ڈیسک //
تہران: ایران نے امریکہ کی جانب سے پیش کی گئی عارضی جنگ بندی کی تجویز کو مسترد کرتے ہوئے واضح کیا ہے کہ وہ صرف مستقل طور پر جنگ کے خاتمے کا خواہاں ہے۔ ایرانی سرکاری خبر رساں ادارے اسلامک ریپبلک نیوز ایجنسی کے مطابق ایران نے اپنا باضابطہ جواب پاکستان کے ذریعے واشنگٹن تک پہنچایا۔
رپورٹ کے مطابق ایران کا جواب 10 نکاتی فریم ورک پر مشتمل ہے، جس میں نہ صرف فوری جنگ بندی بلکہ پورے خطے میں جاری تنازعات کے خاتمے پر زور دیا گیا ہے۔ اس منصوبے میں آبنائے ہرمز سے محفوظ گزرگاہ کو یقینی بنانے، اقتصادی پابندیوں کے خاتمے اور متاثرہ علاقوں کی بحالی کے اقدامات بھی شامل ہیں۔
ادھر سفارتی کوششیں مختلف ذرائع کے ذریعے جاری ہیں، جس میں پاکستان اہم کردار ادا کر رہا ہے اور تہران و واشنگٹن کے درمیان پیغامات کی ترسیل کا ذریعہ بنا ہوا ہے۔
دوسری جانب وائٹ ہاؤس کے ایک عہدیدار نے امریکی نشریاتی ادارے سی بی ایس نیوز کو بتایا کہ پاکستان کی حمایت سے پیش کی گئی جنگ بندی تجویز کئی آپشنز میں سے ایک ہے، تاہم امریکی صدر نے ابھی تک اس کی منظوری نہیں دی۔ عہدیدار کے مطابق "آپریشن ایپک فیوری” بدستور جاری ہے۔
