امت نیوز ڈیسک //
راجوری، 9 اپریل : کویت میں پیش آنے والے ایک المناک سڑک حادثے میں جموں و کشمیر سے تعلق رکھنے والے پانچ افراد جاں بحق ہو گئے، جن میں ایک شخص تھنہ منڈی (راجوری) اور چار افراد سرنکوٹ (پونچھ) کے رہنے والے تھے۔ لواحقین نے حکومت سے میتوں کی جلد وطن واپسی کے لیے مدد کی اپیل کی ہے۔
اطلاعات کے مطابق جاں بحق افراد کویت میں محنت مزدوری کر کے اپنے خاندانوں کی کفالت کر رہے تھے کہ اسی دوران یہ افسوسناک حادثہ پیش آیا۔ اس واقعے کے بعد تھنہ منڈی اور سرنکوٹ سمیت متعلقہ علاقوں میں کہرام مچ گیا ہے اور ہر طرف سوگ کا ماحول ہے۔
اہلِ خانہ نے جموں و کشمیر کے لیفٹیننٹ گورنر اور وزیر اعلیٰ سے اپیل کی ہے کہ میتوں کو جلد از جلد واپس لانے کے لیے ضروری اقدامات کیے جائیں تاکہ مرحومین کی آخری رسومات اپنے آبائی علاقوں میں ادا کی جا سکیں۔
ابتدائی اطلاعات کے مطابق یہ حادثہ کویت کی ایک شاہراہ پر دو گاڑیوں کے درمیان تصادم کے باعث پیش آیا، تاہم حادثے کی مکمل تفصیلات تاحال سامنے نہیں آ سکیں۔ مقامی ذرائع کے مطابق تمام پانچ افراد اسی حادثے میں جاں بحق ہوئے۔
حکام کی جانب سے جاں بحق افراد کی شناخت کی باضابطہ تصدیق اور سفارتی ذرائع سے رابطہ جاری ہے۔
واضح رہے کہ جموں و کشمیر سے بڑی تعداد میں لوگ روزگار کی تلاش میں خلیجی ممالک، خصوصاً کویت کا رخ کرتے ہیں، جہاں وہ زیادہ تر محنت طلب شعبوں میں کام کرتے ہیں۔
