امت نیوز ڈیسک //
نئی دہلی، 4 مئی: بارہمولہ سے رکن پارلیمنٹ شیخ عبدالرشید نے پیر کے روز دہلی ہائی کورٹ سے اپنی عبوری ضمانت کی شرائط میں ترمیم کی درخواست کی۔ انہوں نے عدالت سے گزارش کی کہ انہیں دہلی جانے کی اجازت دی جائے تاکہ وہ اپنے علیل والد کے ساتھ رہ سکیں، جنہیں سری نگر سے آل انڈیا انسٹی ٹیوٹ آف میڈیکل سائنسز منتقل کیا گیا ہے۔
جسٹس پرتھیبا ایم سنگھ اور جسٹس مدھو جین پر مشتمل بنچ نے، جس نے پہلے انہیں عبوری ضمانت کے دوران سری نگر تک محدود رکھا تھا، اس معاملے کی سماعت منگل کے لیے مقرر کی اور انہیں دہلی میں مقامی پتہ فراہم کرنے کی ہدایت دی۔
رشید کے وکیل نے عدالت کو بتایا کہ بطور رکن پارلیمنٹ انہیں دہلی میں ایک فلیٹ الاٹ ہے، تاہم عدالت نے واضح کیا کہ انہیں ایسے مقام پر رہنے کی اجازت نہیں دی جائے گی جہاں دیگر اراکین پارلیمنٹ بھی مقیم ہوں۔
اس معاملے کی مزید سماعت منگل کو ہوگی۔
