امت نیوز ڈیسک //
سری نگر، 10 مئی: جموں و کشمیر کے وزیر اعلیٰ عمر عبداللہ نے اتوار کو سری نگر کے Royal Springs Golf Course میں انڈیا گالف کارنیوال 2026 کا افتتاح کیا۔ اس ٹورنامنٹ میں 100 سے زائد گالفرز نے حصہ لیا، جن میں جموں و کشمیر کے 30 سے زیادہ کھلاڑی بھی شامل تھے۔
اس موقع پر خطاب کرتے ہوئے عمر عبداللہ نے کہا کہ کشمیر کا گالف کے ساتھ ایک گہرا اور تاریخی تعلق رہا ہے، اور یہاں سری نگر، گلمرگ اور پہلگام سمیت ملک کے بہترین گالف کورسز موجود ہیں۔
انہوں نے کہا، “ہم مقامی گالفرز کی حوصلہ افزائی کرنا چاہتے ہیں اور ان گالف کورسز کو سیاحت کے فروغ کے لیے بھی استعمال کر رہے ہیں۔”
وزیر اعلیٰ نے کہا کہ اس ٹورنامنٹ کا مقصد گالف کھیل کو فروغ دینا اور جموں و کشمیر کے نوجوانوں کو اس کھیل کی جانب راغب کرنا ہے۔
انہوں نے مزید کہا کہ کشمیر میں گالف سیاحت میں مسلسل اضافہ ہو رہا ہے اور ملک کے مختلف حصوں سے گالفرز مختصر تعطیلات کے دوران صرف گالف کھیلنے کے لیے سری نگر آ رہے ہیں۔
