امت نیوز ڈیسک //
نئی دہلی: نیشنل ٹیسٹنگ ایجنسی نے میڈیکل داخلہ امتحان نیٹ یو جی کے دوبارہ انعقاد کی نئی تاریخ کا اعلان کر دیا ہے۔ این ٹی اے کے مطابق دوبارہ امتحان اتوار 21 جون 2026 کو منعقد ہوگا۔ حکومت ہند کی منظوری کے بعد اس فیصلے کا باضابطہ اعلان کیا گیا۔
این ٹی اے نے اپنے بیان میں امیدواروں اور والدین سے اپیل کی ہے کہ وہ صرف نیشنل ٹیسٹنگ ایجنسی کے سرکاری ذرائع اور پلیٹ فارمز پر ہی اعتماد کریں اور افواہوں سے گریز کریں۔
واضح رہے کہ نیٹ یو جی 2026 کا امتحان 3 مئی کو منعقد ہوا تھا، جس میں تقریباً 22 لاکھ سے زائد طلبہ نے شرکت کی تھی۔ تاہم پیپر لیک کے الزامات سامنے آنے کے بعد مرکزی حکومت نے 12 مئی کو امتحان منسوخ کر دیا تھا۔
اس معاملے پر جمعرات کو مرکزی وزیر تعلیم کی رہائش گاہ پر ایک اعلیٰ سطحی اجلاس منعقد ہوا، جس میں دوبارہ امتحان کی تیاریوں اور سکیورٹی انتظامات کا جائزہ لیا گیا۔ اجلاس میں اعلیٰ تعلیم کے سکریٹری ونیت جوشی، اسکولی تعلیم کے سکریٹری سنجے کمار، این ٹی اے کے ڈائریکٹر جنرل ابھیشیک سنگھ، سی بی ایس ای کے چیئرمین راہل سنگھ سمیت کئی سینئر افسران نے شرکت کی۔
این ٹی اے نے واضح کیا ہے کہ امیدواروں کو دوبارہ رجسٹریشن کرانے کی ضرورت نہیں ہوگی اور نہ ہی کوئی اضافی فیس وصول کی جائے گی۔ تمام امیدوار اپنے پہلے سے جاری کردہ رجسٹریشن کی بنیاد پر ہی امتحان میں شرکت کریں گے۔
ادھر سی بی آئی نیٹ یو جی پیپر لیک معاملے کی تحقیقات کر رہی ہے۔ حکام کے مطابق اب تک کئی افراد کو گرفتار کیا جا چکا ہے جبکہ بعض سرکاری اہلکاروں کے کردار کی بھی جانچ جاری ہے۔ سی بی آئی کا کہنا ہے کہ معاملے میں مزید گرفتاریاں بھی ہو سکتی ہیں۔
قابل ذکر ہے کہ نیٹ یو جی امتحان ایم بی بی ایس، بی ڈی ایس اور دیگر میڈیکل انڈرگریجویٹ کورسز میں داخلے کے لیے منعقد کیا جاتا ہے۔ اس سال امتحان ملک کے 551 شہروں اور بیرون ملک 14 شہروں میں قلم و کاغذ کے طریقے سے منعقد ہوا تھا۔
