امت نیوز ڈیسک //
پہلگام، 16 مئی: جنوبی کشمیر کے ضلع اننت ناگ کے پہلگام علاقے میں ہفتہ کے روز ایک المناک سڑک حادثہ پیش آیا، جب ایک تویرا گاڑی زیر نمبر JK21A-0379 پہلگام سے آڑو کی جانب جاتے ہوئے بے قابو ہو کر گہری کھائی میں جا گری۔
حکام کے مطابق گاڑی کو رئیس احمد بٹ ولد محمد مقبول بٹ، ساکن رنگورڈ لاری پورہ چلا رہا تھا۔ اس حادثے میں گجرات سے تعلق رکھنے والے دو سیاح جاں بحق جبکہ دو دیگر زخمی ہوگئے۔
مہلوکین کی شناخت باوِن بھاوسار ولد مہیش بھاوسار اور ان کی اہلیہ آونی بھاوسار کے طور پر ہوئی ہے۔ باوِن بھاوسار کو سب ضلع اسپتال پہلگام پہنچایا گیا جہاں ڈاکٹروں نے انہیں مردہ قرار دیا، جبکہ آونی بھاوسار شدید زخمی ہونے کے بعد دورانِ علاج دم توڑ گئیں۔
زخمیوں کی شناخت نینا بین زوجہ اشوک بھائی اور اشوک بھائی کے طور پر ہوئی ہے، جن کا تعلق بھی ریاست گجرات سے بتایا جا رہا ہے۔ دونوں زخمیوں کو ابتدائی علاج کے بعد بہتر طبی سہولیات کے لیے ریفر کیا جا رہا ہے۔
پولیس نے واقعے کا نوٹس لیتے ہوئے تحقیقات شروع کر دی ہیں۔
