امت نیوز ڈیسک //
سری نگر، 7 جولائی: جموں و کشمیر کی سول سوسائٹی کے مختلف شعبوں سے تعلق رکھنے والے 150 سے زائد نمائندوں کا ایک اہم اجلاس منگل کو ایس کے آئی سی سی سری نگر میں منعقد ہوا۔ اجلاس کی صدارت جموں و کشمیر نیشنل کانفرنس کے صدر نے کی، جبکہ نائب صدر اور وزیر اعلیٰ بھی اس موقع پر موجود تھے۔
اجلاس میں شریک نمائندوں نے متفقہ طور پر ایک قرارداد منظور کی، جس میں حکومتِ ہند سے مطالبہ کیا گیا کہ جموں و کشمیر کو مزید کسی تاخیر کے بغیر مکمل ریاستی درجہ بحال کیا جائے۔
قرارداد میں کہا گیا کہ اجلاس میں شریک سول سوسائٹی کے نمائندوں کی متفقہ رائے یہی ہے کہ جموں و کشمیر کو فوری طور پر مکمل ریاست کا درجہ دیا جائے۔ شرکا نے اس مطالبے کو عوامی خواہشات کی عکاسی قرار دیتے ہوئے امید ظاہر کی کہ مرکزی حکومت اس دیرینہ مطالبے پر جلد مثبت فیصلہ کرے گی۔
