امت نیوز ڈیسک //
بڈگام: ضلع بڈگام کے علاقے کھاگ میں مسلسل بارشوں کے باعث سیلابی نالے میں بہہ جانے والے نو بیاہتا نوجوان کی لاش بدھ کی صبح رات بھر جاری رہنے والے سرچ آپریشن کے بعد برآمد کر لی گئی۔
متوفی کی شناخت شبیر احمد پسوال ولد ساکن درنگ، کھاگ کے طور پر ہوئی ہے۔
حکام کے مطابق مسلسل موسلا دھار بارشوں کے باعث نالے میں پانی کی سطح اچانک بلند ہوگئی، جس کے نتیجے میں شبیر احمد تیز ریلے کی زد میں آ کر لاپتہ ہوگئے تھے۔ واقعے کے فوراً بعد سول انتظامیہ، جموں و کشمیر پولیس، ایس ڈی آر ایف اور دیگر امدادی اداروں نے بڑے پیمانے پر ریسکیو آپریشن شروع کیا۔
کئی گھنٹوں تک جاری مشترکہ تلاش کے بعد مقامی افراد، تحصیلدار کھاگ، ایس ایچ او کھاگ مدثر احمد، ریسکیو اہلکاروں، رضاکاروں اور مقامی نوجوانوں کی مشترکہ کوششوں سے لاش کو اشریہ نالہ سے برآمد کیا گیا۔
ادھر مسلسل بارشوں کے باعث بڈگام کے کئی علاقوں میں سیلابی صورتحال برقرار ہے۔ متعدد دیہات زیر آب آ گئے ہیں، بنیادی ڈھانچے کو نقصان پہنچا ہے اور دریاؤں و نالوں میں طغیانی کے باعث انتظامیہ نے ہنگامی اقدامات مزید تیز کر دیے ہیں۔
بڈگام پولیس نے عوام سے اپیل کی ہے کہ غیر ضروری سفر سے گریز کریں اور دریاؤں، ندی نالوں، پشتوں اور سیلاب سے متاثرہ علاقوں کے قریب جانے سے احتراز کریں۔ پولیس نے ہنگامی صورتحال سے نمٹنے کے لیے 24 گھنٹے فعال ہیلپ لائنیں بھی قائم کی ہیں۔
پولیس نے والدین سے بچوں کو کھلے نالوں، برساتی ندیوں اور تیز بہاؤ والے پانی سے دور رکھنے کی اپیل کی ہے، جبکہ عوام سے کہا گیا ہے کہ پانی کی بڑھتی ہوئی سطح دیکھنے یا تصاویر بنانے کے لیے آبی ذخائر کے قریب جمع نہ ہوں کیونکہ اچانک تیز بہاؤ جان لیوا ثابت ہو سکتا ہے۔
ڈپٹی کمشنر بڈگام نے تمام متعلقہ محکموں کو ہائی الرٹ رہنے کی ہدایت دیتے ہوئے پولیس، ایس ڈی آر ایف، سول ڈیفنس، فائر اینڈ ایمرجنسی سروسز اور دیگر اداروں کو مکمل طور پر متحرک رہنے کا حکم دیا ہے۔ انہوں نے عوام سے انتظامیہ کے ساتھ تعاون کرنے، انتہائی ضرورت کے بغیر گھروں سے باہر نہ نکلنے اور پولیس و سول انتظامیہ کی جانب سے جاری حفاظتی ہدایات پر سختی سے عمل کرنے کی اپیل کی ہے۔
