امت نیوز ڈیسک //
سرینگر، 21 جولائی: جموں و کشمیر کے وزیر اعلیٰ عمر عبداللہ نے کہا ہے کہ جموں و کشمیر کی خصوصی حیثیت کی بحالی کے لیے ریاستی درجہ (اسٹیٹ ہڈ) کی واپسی ناگزیر ہے۔ انہوں نے کہا کہ نیشنل کانفرنس مرکزی حکومت کو اپنے وعدے کی مسلسل یاد دہانی کراتی رہے گی اور امید ظاہر کی کہ حکومت جلد ریاستی درجہ بحال کرے گی۔
عمر عبداللہ نے کہا، "جموں و کشمیر کا ریاستی درجہ اس کی خصوصی حیثیت کی بحالی کے لیے ضروری ہے۔ نیشنل کانفرنس اس مطالبے سے ہرگز پیچھے نہیں ہٹے گی اور مرکز کو اس کے وعدے کی یاد دلاتی رہے گی۔”
انہوں نے بتایا کہ دہلی میں ریاستی درجہ کی بحالی کے مطالبے کے لیے جنتر منتر پر احتجاج کیا گیا، تاہم پولیس کی بھاری نفری کی تعیناتی کے باعث انہیں احتجاجی مقام تک پہنچنے سے روک دیا گیا۔
وزیر اعلیٰ نے کہا کہ دہلی میں کیا گیا احتجاج صرف آغاز ہے، اختتام نہیں۔ انہوں نے یقین دلایا کہ نیشنل کانفرنس نے عوام سے جو وعدے کیے ہیں، وہ ان پر قائم ہے اور ان کی تکمیل کے لیے جدوجہد جاری رہے گی۔
عمر عبداللہ نے مزید کہا کہ پارٹی قیادت جلد نئی حکمتِ عملی اور آئندہ کے لائحۂ عمل کا اعلان کرے گی تاکہ جموں و کشمیر کے ریاستی درجہ کی بحالی اور عوامی حقوق کے حصول کے لیے تحریک کو مزید مؤثر بنایا جا سکے۔
