امت نیوز ڈیسک //
سری نگر، 22 جولائی: معروف ماہرِ موسمیات سونم لوٹس نے کہا ہے کہ آج جموں و کشمیر میں موسم کی صورتحال انتہائی نازک رہے گی، اس لیے عوام غیر ضروری سفر سے گریز کریں اور انتظامیہ کی جانب سے جاری ہدایات پر سختی سے عمل کریں۔
انہوں نے امید ظاہر کی کہ کل (23 جولائی) سے موسم میں بتدریج بہتری آنے کا امکان ہے۔
سونم لوٹس کے مطابق موجودہ بارشوں کا سلسلہ فعال مانسون اور بحیرۂ عرب سے آنے والی نمی کے باعث جاری ہے، جس کے نتیجے میں جموں و کشمیر کے مختلف علاقوں میں شدید بارشیں ریکارڈ کی گئی ہیں۔ تاہم سری نگر اور جنوبی کشمیر کے کئی علاقوں میں دیگر مقامات کے مقابلے میں نسبتاً کم بارش ہوئی ہے۔
انہوں نے کہا کہ آج بھی صورتحال تشویشناک ہے، اس لیے عوام کو محتاط رہنا چاہیے اور سرکاری ایڈوائزری پر مکمل عمل کرنا چاہیے۔
ماہرِ موسمیات نے بتایا کہ ہمالیائی خطے میں بادل پھٹنے اور اچانک سیلاب (فلیش فلڈ) جیسے واقعات غیر معمولی نہیں ہیں، بلکہ جموں و کشمیر، لداخ اور ہماچل پردیش میں شدید بارشوں کے دوران ایسے واقعات پیش آتے رہتے ہیں۔
انہوں نے مزید کہا کہ مسلسل بارشوں کے باعث زمین پہلے ہی پانی سے بھر چکی ہے اور اب مزید پانی جذب کرنے کی صلاحیت کم ہو گئی ہے، جس کی وجہ سے مختلف علاقوں میں اچانک سیلاب کی صورتحال پیدا ہو رہی ہے۔
سونم لوٹس نے عوام سے اپیل کی کہ موسم بہتر ہونے تک نشیبی اور حساس علاقوں کا سفر نہ کریں، دریاؤں، ندی نالوں اور لینڈ سلائیڈنگ کے خدشے والے مقامات سے دور رہیں اور انتظامیہ کی تمام ہدایات پر عمل کریں۔
