امت نیوز ڈیسک //
جموں (جموں و کشمیر):صوبہ جموں کے سانبہ ضلع میں بین الاقوامی سرحد کے قریب ایک زنگ آلود اینٹی ٹینک بارودی سرنگ برآمد ہوئی ہے۔ سرنگ کی اطلاع موصول ہوتے ہی پولیس اور دیگر سیکورٹی اہلکار موقع پر پہنچ گئے۔ حفاظتی اہلکاروں کا کہنا ہے کہ بم ڈسپوزل اسکواڈ کی ٹیم بھی موقع پر پہنچ چکی ہے اور اینٹی ٹینک سرنگ کو ناکارہ بنائے جانے کی کوششیں کی جا رہی ہیں۔
ایک پولیس اہلکار نے بتایا کہ بارڈر سیکورٹی فورس (بی ایس ایف) کی ایک گشتی پارٹی کو جمعہ کو رات دیر گئے سانبہ کے ماوا گاؤں کے قریب بسنتر ندی کے کنارے ایک زنگ آلود بارودی سرنگ برآمد ہوئی جس کے بعد علاقے کو محاصرے میں لے لیا گیا۔ قابل ذکر ہے کہ گزشتہ کئی ہفتوں سے صوبہ جموں کے سرحدی علاقوں میں دھماکہ خیز مواد خصوصاً آئی ای ڈی برآمد ہوئیں جنہیں بم ڈسپوزل اسکواڈ نے ناکارہ بنا کر بڑے حادثات کو ٹال دیا۔
جنوری ماہ میں صوبہ جموں کے ضلع راجوری کے ڈنگری علاقے میں عسکریت پسندوں کی جانب سے اقلیتی طبقہ پر کیے گئے حملوں کے بعد حفاظتی اہلکاروں کی جانب سے کیے گئے سرچ آپریشن کے بعد راجوری پونچھ سمیت جموں ضلع میں بھی متعدد آئی ای ڈیز برآمد کی گئی تھیں جنہیں حفاظتی اہلکاروں نے ناکارہ بنا دیا تھا۔ ادھر، چند ہفتہ قبل جموں میں حفاظتی اہلکاروں نے پہلی مرتبہ پرفیوم نما دھماکہ خیز مواد بھی برآمد کیا تھا۔
