امت نیوز ڈیسک //
سرینگر، 23 جنوری: جموں و کشمیر کے وزیر اعلیٰ عمر عبداللہ نے جمعہ کے روز سول سیکریٹریٹ سرینگر میں بجٹ 2026-27 کی تیاریوں کے سلسلے میں مختلف شعبوں سے تعلق رکھنے والے اسٹیک ہولڈرز کے ساتھ قبل از بجٹ مشاورتی اجلاس کی صدارت کی۔
اس اجلاس میں وزراء سکینہ ایتو، جاوید احمد ڈار اور ستیش شرما کے علاوہ ایڈیشنل چیف سیکریٹری دھیراج گپتا، ایڈیشنل چیف سیکریٹری سیاحت آشیش چندر ورما، پرنسپل سیکریٹری فائنانس سنتوش ڈی ویدیہ، کمشنر سیکریٹری انڈسٹریز اینڈ کامرس وکرم جیت سنگھ، سیکریٹری سوشل ویلفیئر سرمد حفیظ اور دیگر اعلیٰ افسران نے شرکت کی۔
میٹنگ کے دوران صنعت کاروں، تاجروں، ہوٹل مالکان، ٹور اینڈ ٹریول آپریٹرس، ماہرین تعلیم، کسانوں، باغبانی سے وابستہ افراد، کاروباری حضرات اور مختلف تجارتی تنظیموں کے نمائندوں نے آنے والے بجٹ کے لیے اپنی تجاویز اور آراء پیش کیں۔
وزیر اعلیٰ عمر عبداللہ نے خطاب کرتے ہوئے کہا کہ قبل از بجٹ مشاورتی اجلاس حکومت کے سالانہ عمل کا ایک اہم حصہ ہیں، جن کا مقصد مختلف شعبوں سے فیڈ بیک حاصل کرنا اور وسائل کی مؤثر تقسیم کو یقینی بنانا ہے۔ انہوں نے کہا کہ ایسی مشاورت اقتصادی چیلنجز سے نمٹنے اور ہمہ گیر ترقی کو فروغ دینے میں کلیدی کردار ادا کرتی ہے۔
انہوں نے اس بات پر زور دیا کہ حکومت عوامی امنگوں اور جذبات کی عکاسی کرنے والا ایک عوام دوست بجٹ پیش کرنے کے لیے پرعزم ہے۔ وزیر اعلیٰ نے شرکاء کو یقین دلایا کہ اجلاس کے دوران موصول ہونے والی تجاویز کا بغور جائزہ لیا جائے گا اور جہاں ممکن ہوا انہیں بجٹ 2026-27 میں شامل کیا جائے گا۔
یہ مشاورتی نشست جموں و کشمیر کے آئندہ بجٹ کو حقیقت پسندانہ اور عوامی ضروریات سے ہم آہنگ بنانے کی کوششوں کا حصہ ہے۔
