امت نیوز ڈیسک //
سرینگر: جموں وکشمیر پولیس نے سرینگر میں 70 کروڑ روپیہ مالیت کی ہیروئن برآمد کرکے دو منشیات فروشوں کو حراست میں لیا۔معلوم ہوا ہے کہ جمعے کے روز اس کاروبار میں ملوث تیسرے منشیات فروش کو بھی دھر دبوچ کر سلاخوں کے پیچھے دھکیل دیا گیا۔پولیس نے جمعرات کے روز سی آر پی ایف اہلکار سمیت دو افراد کو حراست میں لیا تھا۔ ذرائع نے بتایا کہ ابتدائی تحقیقات کے دوران منکشف ہوا ہے کہ سی آر پی ایف اہلکار سجاد احمد بڈانہ ساکن کرناہ 160بٹالین سی آر پی ایف میں تعینات ہے ۔پولیس ذرائع کے مطابق معاملے کی بڑے پیمانے پر تحقیقات جاری ہے اور مزید گرفتاریوں کو خارج از امکان قرار نہیں دیاجاسکتا ۔
ایڈیشنل ڈائریکٹر جنرل آف پولیس کشمیر رینج وجے کمار نے ٹویٹ کے ذریعے جانکاری دیتے ہوئے بتایا کہ سری نگر پولیس نے دو منشیات فروش جن کی شناخت سجاد احمد بڈانہ ساکن نچان کرناہ اور ظہیر احمد ٹنچ ساکن امروی کرناہ کے بطور ہوئی ہے کو حراست میں لیا۔انہوں نے بتایا کہ گرفتار شدگان کے قبضے سے گیارہ لاکھ 82ہزار پانچ سو روپیہ نقدی، 11کلو گرام ہیروئن برآمد کی گئی ہے۔
واضح رہے کہ جموں و کشمیر پولیس کے ڈی جے پی دلباغ سنگھ نے نے بتایا کہ کپواڑہ ، بارہمولہ ، راجوری اور پونچھ اضلاع میں ڈرون کے ذریعے ہتھیار اور ممنوع نشیلی اشیاء اس طرف بھیجنے کی کوششیں ہو رہی ہیں۔انہوں نے کہا کہ گزشتہ کئی ماہ سے سیکورٹی فورسز نے ڈرون کے ذریعے اس طرف گرائے گئے ہتھیاروں اور نشیلی اشیاء کو برآمد کرکے ضبط کیا۔ان کے مطابق منشیات کے کاروبارے میں ملوث افراد کا سراغ لگایا جارہا ہے اور ان کے خلاف سخت کارروائی ناگزیر ہے۔انہوں نے کہا کہ جموں وکشمیر میں منشیات کے ناسور کو جڑ سے اکھاڑ پھینکنے کی خاطر جموں وکشمیر پولیس نے بڑے پیمانے پر مہم شروع کی ہے۔(یو این آئی)
