امت نیوز ڈیسک//
سری نگر، 11-اپریل، مرکزی وزیر برائے روڈ ٹرانسپورٹ اور ہائی ویز نتن گڈکری نے جموں و کشمیر کے لیفٹیننٹ گورنر منوج سنہا، مرکزی وزیر مملکت جنرل (ڈاکٹر) وی کے۔ سنگھ (ریٹائرڈ) اور مرکزی وزیر مملکت جتیندر سنگھ نے جموں کے سری نگر – بانہال سیکشن سے ادھم پور-رامبن-بنیال سے سری نگر نیشنل ہائی وے (NH-44) کا معائنہ کیا جو جموں اور سری نگر کے درمیان ہمہ موسمی رابطہ فراہم کرنے کے لیے تعمیر کیا جا رہا ہے۔
جموں اور سری نگر کے درمیان سفر کو آسان بنانے کے لیے 35000 کروڑ روپے کی لاگت سے 3 کوریڈور بنائے جا رہے ہیں۔ اس کے تحت جموں سے ادھم پور-رامبن-بانہال اور اس کے بعد سری نگر تک پہلی کوریڈور میں سری نگر سے بانہال تک کا سیکشن شامل ہے۔ 250 کلومیٹر لمبائی کی یہ 4 لین سڑک 16,000 کروڑ روپے کی لاگت سے بنائی جا رہی ہے۔ اس میں سے 210 کلومیٹر کے راستے کی 4 لیننگ مکمل ہو چکی ہے، جس میں 21.5 کلومیٹر کی 10 سرنگیں بھی شامل ہیں۔
اس سڑک کی 4 لیننگ کا ڈیزائن جیو ٹیکنیکل اور جیولوجیکل انویسٹی گیشن کی بنیاد پر کیا گیا ہے تاکہ اس علاقے میں ممکنہ لینڈ سلائیڈنگ پر قابو پایا جا سکے۔ جموں اور سری نگر کے درمیان سفر کو محفوظ اور ہموار بنانے کے لیے کریش بیریئرز اور روڈ سیفٹی کے دیگر اقدامات بھی لگائے گئے ہیں۔
اس راستے کی تعمیر سے جموں اور سری نگر کے درمیان ہمہ موسمی رابطہ رہے گا۔ سری نگر سے جموں کا سفر کا وقت 9-10 گھنٹے سے کم ہو کر 4-5 گھنٹے ہو جائے گا۔ رامبن اور بانہال کے درمیان 40 کلومیٹر 4 لین والی سڑک کا کیریج وے جون 2024 تک مکمل ہو جائے گا جس سے سری نگر کے مسافروں کو راحت ملے گی۔
