پیر محمد عامر قریشی/گاندربل
بدھ کے روز ڈریم لینڈ اسکول، بیہامہ، گاندربل کے لڑکوں کے دو گروپوں کے درمیان ہاتھا پائی ہوئی جس میں زاہد شبیر ولد شبیر احمد ریشی بانڈی باغ، گاندربل نامی طالبعلم نے دو ساتھی طلبہ پر تیز دھاروالے چاقو حملہ کیا۔ جس کے نتیجے میں دونوں زخمی ہو گئے۔ زخمی طلباء کی شناخت ہدایت احمد اور ابراہیم احمد کے طور پر ہوئی ہے، دونوں گاندربل کے بیہامہ کے رہنے والے ہیں۔ واقعے کے فوراً بعد دونوں زخمی طلباء کو علاج کے لیے سکمز منتقل کر دیا گیا۔ اپنے ساتھی طلبہ پر حملہ کرنے والا زاہد موقع سے فرار ہوگیا۔ اس واقعہ پر ایف آئی آر نمبر 116/2023 پولیس اسٹیشن گاندربل میں متعلقہ دفعات کے تحت درج کی گئی۔
ملزم کی گرفتاری کے لیے ڈی ایس پی پی سی گاندربل کی نگرانی میں ایک ٹیم تشکیل دی گئی، سخت کوششوں کے بعد پولیس ٹیم نے ملزم کو بروسا کے قریب سے پکڑ لیا۔ تفتیش کے دوران یہ بات سامنے آئی کہ یہ واقعہ معمولی باتوں پر پیش آیا جس میں مزید چند طلباء بھی جھگڑے میں ملوث تھے۔ زاہد جو ڈریم لینڈ اسکول کی 12ویں جماعت کا طالب علم ہے شروع سے ہی جارحانہ رہا ہے اور اسکول کے پرنسپل کے مطابق وہ ماضی میں دیگر طلبہ کے ساتھ متعدد لڑائیوں میں ملوث رہا ہے۔
تمام قانونی طریقہ کار اور رسمی کارروائیوں کے ساتھ ملزم کو جووینائل بورڈ کے سامنے پیش کیا جائے گا اور دیگر طلباء جو جھگڑے میں ملوث تھے انہیں بھی لایا جائے گا اور بورڈ کے سامنے پیش کیا جائے گا۔
