امت نیوز ڈیسک //
نئی دہلی : ون ڈے ورلڈ کپ میں 15 اکتوبر کو احمد آباد میں ہونے والے پاک ہندوستان میچ کی تاریخ تبدیل کر دی گئی ہے۔ یہ میچ اب 14 اکتوبر کو کھیلا جائے گا۔
پاکستان کرکٹ بورڈ (پی سی بی) نے تاریخ تبدیل کرنے پر رضامندی ظاہر کر دی ہے۔ پاکستان کے سری لنکا کے خلاف میچ کی تاریخ بھی تبدیل کر دی گئی ہے۔
یہ میچ 12 اکتوبر کو کھیلا جانا تھا۔ اب یہ میچ 10 اکتوبر کو ہوگا۔ اس تبدیلی کی وجہ سے پاکستان کو ہندوستان کے خلاف میچ سے پہلے 3 دن کا وقفہ مل جائے گا۔ون ڈے ورلڈ کپ 5 اکتوبر سے کھیلا جائے گا اور انٹرنیشنل کرکٹ کونسل (آئی سی سی) نے جون کے آخر میں اس کا شیڈول جاری کیا تھا۔
دوسری ٹیموں کے کچھ میچوں کے اوقات میں بھی تبدیلی کی جا سکتی ہے۔ آئی سی سی نیا شیڈول جلد جاری کرے گا۔ سیکورٹی وجوہات کی بنا پر تاریخ میں تبدیلی کی جا رہی ہے سیکورٹی ایجنسیوں نے احمد آباد میں 15 اکتوبر کو ہونے والے میچ کے بارے میں تشویش ظاہر کی تھی۔ ایجنسیوں نے کہا تھا کہ یہ تاریخ نوراتری کا پہلا دن ہوگی۔ ایسی صورت حال میں مناسب سیکورٹی فراہم کرنے میں مسئلہ ہو سکتا ہے۔ اس کے بعد آئی سی سی اور بی سی سی آئی نے پاکستان بورڈ سے رابطہ کیا اور 2 گروپ میچوں کی تاریخ تبدیل کرنے کی بات کی۔
