امت نیوز ڈیسک //
جموں: بی جے پی کے جموں وکشمیر یونٹ کے صدر رویندر رینہ کا کہنا ہے کہ پونچھ میں تین افراد کی ہلاکتوں کے ذمہ داروں کو سخت سزا دی جائے گی۔انہوں نے کہا کہ میں لوگوں کو یقین دلانا چاہتا ہوں کہ ان کے ساتھ انصاف کیا جائے گا۔موصوف صدر نے ان باتوں کا اظہار جمعہ کو پونچھ میں نامہ نگاروں کے ساتھ بات کرنے کے دوران کیا جہاں وہ 22 دسمبر کو بفلیاز علاقے میں پر اسرار حالت میں مردہ پائے گئے تین عام شہریوں کے اہلخانہ کے ساتھ اظہار تعزیت کرنے کے لئے گئے تھے۔
اس موقع پر انہوں نے میڈیا کے ساتھ بات کرتے ہوئے کہا کہ ‘گنہگاروں کو قانون بہت بڑی سزا دے گا ہمارے ملک میں قانون سب سے بڑا ہے قانون سے بڑا کوئی نہیں ہے’۔انہوں نے کہا کہ ‘جن لوگوں نے یہ غلطی کی ہے یہ ایک بڑی غلطی ہے اور قانون اس غلطی کے مرتکبین کو بھی بڑی سزا دے گا’۔ان کا کہنا تھا کہ ‘میں لوگوں کو یقین دلانا چاہتا ہوں کہ آپ کے ساتھ انصاف کیا جائے گا’۔انہوں نے کہا کہ میں آج یہاں لواحقین کے ساتھ تعزیت کرنے اور یہاں کے لوگوں کا دکھ بانٹنے کے لئے آیا ہوں۔
(یو این آئی)
