امت نیوز ڈیسک //
سری نگر: نیشنل سینٹر فار سیسمولوجی (این ایس سی) نے کہا کہ جمعرات کو جموں و کشمیر میں ریکٹر اسکیل پر 3.9 شدت کے زلزلے کے جھٹکے محسوس کیے گئے ہیں۔ نیشنل سینٹر فار سیسمولوجی کے مطابق زلزلہ رات میں تقریبا ساڑھے بارہ بجے کے قریب 5 کلومیٹر کی گہرائی میں آیا۔ نیشنل سینٹر فار سیسمولوجی کے مطابق اس زلزلے کے جھٹکے جموں کے شہر کشتواڑ میں محسوس کیے گئے ہیں۔
واضح رہے کہ جموں وکشمیر میں اس شدت کے زلزلے کے جھٹکے پہلے بھی محسوس کیے گئے ہیں۔ تاہم ان زلزلوں میں کسی طرح کا کوئی جانی و مالی نقصان نہیں ہوا تھا۔ سنہ 2023 میں بھی جموں وکشمیر میں متعدد مرتبہ زلزلے کے جھٹکے محسوس کیے گئے تھے۔ مارچ 2023 میں 6.9 شدت کا زلزلہ آیا تھا اسی دوران کشمیر میں ایک فلم کی شوٹنگ جاری تھی تاہم اس زلزلے کے دوران اداکار سمیت شوٹنگ کرنے والی پوری ٹیم محفوظ رہی تھی۔
