امت نیوز ڈیسک //
بکرم گنج (روہتاس): وزیر اعظم نریندر مودی نے آج ایک بار پھر بہار کی سرزمین سے دہشت گردوں اور ان کے سرپرستوں کو سخت لہجے میں خبردار کرتے ہوئے کہا کہ ’آپریشن سندور‘ ہمارے ترکش کا محض ایک تیر ہے، اگر دہشت گردی نے دوبارہ سر اٹھایا تو ہم بل سے نکال کر اسے کچل دیں گے
وزیر اعظم مودی نے جمعہ کو روہتاس ضلع کے بکرم گنج میں تقریباً 48 ہزار کروڑ روپے کی منصوبوں کا افتتاح اور سنگ بنیاد رکھنے کے بعد ایک عوامی جلسے سے خطاب کرتے ہوئے کہا کہ ”دشمن یہ جان لے کہ’آپریشن سندور‘ ہمارے ترکش کا صرف ایک تیر ہے۔ بھارت کی جنگ نہ رکی ہے نہ تھمی ہے۔ اگر دہشت گردی نے پھر سے سر اٹھایا تو ہم اسے بل سے کھینچ کر کچل دیں گے، چاہے وہ سرحد پار ہو یا سرحد کے اندر۔“
وزیر اعظم نے مزید کہاکہ” پران جائے پر وچن نہ جائے یعنی ایک بار جو وعدہ کرلیا، وہ ہر حال میں پورا ہوکر ہی رہتا ہے۔ پربھو رام کی یہ رسم آج کے نئے ہندوستان کی پالیسی بن گئی ہے۔ بہار کی سرزمین سے ملک سے وعدہ کیاتھاکہ دہشت گردوں کے ٹھکانوں کو مٹی میں ملا دیاجائے گا۔ بہار کی سرزمین پر میں نے کہا تھا کہ انہیں تصور سے بھی بڑی سزا دی جائے گی۔ آج جب میں بہار آیا ہوں تو اپنا وعدہ پورا کرنے کے بعد آیا ہوں۔ ہماری فوج نے ان کے ٹھکانوں کو کھنڈر میں بدل دیا ہے۔“
