امت نیوز ڈیسک //
جموں،: جموں و کشمیر پولیس نے ہفتے کے روز ضلع کشتواڑ میں ملی ٹنسی کے ماحولیاتی نظام پر بڑے پیمانے پر کریک ڈاؤن کرتے ہوئے پاکستان اور پاکستان زیر انتظام کشمیر میں مقیم 26 ملی ٹنٹوں کے گھروں کی تلاشی لی۔
حکام نے بتایا کہ جن گھروں کی تلاشی لی گئی ان میں حزب المجاہدین سے وابستہ ملی ٹینٹ محمد امین بٹ عرف جہانگیر سرودی کا گھر بھی شامل ہے۔
انہوں نے کہا کہ چھاپے پاکستان اور پاکستان زیر انتظام کشمیر سے کام کرنے والے ملی ٹینٹوں اور سرحد پار سے اسلحہ اور گولہ بارود کی اسمگلنگ کرنے والوں کے گھروں پر مارے گئے۔کشتواڑ میں یہ چھاپے قریبی ضلع ڈوڈہ میں 15 مقامات پر اسی طرح کی تلاشی کارروائیاں انجام دینے کے ایک دن بعد مارے گئے۔
حکام نے بتایا کہ پولیس کی مختلف ٹیموں نے ضلع کشتواڑ میں 26 مقامات پر تلاشی لی۔انہوں نے کہاجن گھروں پر چھاپہ مارے گئے ان میں جہانگیر بٹ کا گھر بھی شامل ہے، جو 1990 کی دہائی میں کالعدم تنظیم حزب المجاہدین میں شامل ہوا تھا اور اسے سب سے طویل عرصے تک زندہ رہنے والا ملی ٹینٹ سمجھا جاتا ہے۔(یو این آئی)
