امت نیوز ڈیسک //
سرینگر: ایپکس باڈی لیہ کی جانب سے مرکز کے ساتھ مذاکرات سے علیحدگی کے ایک روز بعد، کرگل ڈیموکریٹک الائنس نے منگل کو اعلان کیا کہ جب تک ان کے کلیدی مطالبات پورے نہیں ہوتے وہ حکومت کے ساتھ بات چیت میں حصہ نہیں لیں گے۔
ایک پریس کانفرنس سے خطاب کرتے ہوئے، خبر رساں ایجنسی کشمیر نیوز آبزرور کے مطابق، الائنس نے 24 ستمبر کو لیہ میں چار شہریوں کی ہلاکت کی غیرجانبدار عدالتی تحقیقات کا مطالبہ کیا۔
کے ڈی اے کے شریک چیئرمین اصغر علی کربلائی نے کہا کہ جب تک ان کے اہم مطالبات تسلیم نہیں کیے جاتے، بشمول گرفتار شدگان کی غیر مشروط رہائی، مزید گرفتاریوں پر روک اور لیہ فائرنگ واقعے کی عدالتی تحقیقات، وہ مذاکراتی میز پر واپس نہیں آئیں گے۔
انہوں نے بعض حلقوں کی جانب سے لداخی آوازوں کو "غیر ملکی یا ملک دشمن” قرار دینے کی بیانیہ سازی کو تنقید کا نشانہ بناتے ہوئے کہا کہ لداخ کے حقوق کے لیے کھڑے ہونے والوں کو اس طرح کے بے بنیاد الزامات کے ذریعے مسترد نہیں کیا جا سکتا۔
انہوں نے مزید کہا، "سونم وانگچک ایک محترم شخصیت ہیں، صرف لداخ میں ہی نہیں بلکہ پورے ملک میں۔”
مرکز نے پیر کو کہا تھا کہ وہ لداخ کے معاملات پر ہمیشہ بات چیت کے لیے تیار ہے اور کے ڈی اے اور لیہہ ایپکس باڈی دونوں کے ساتھ کلیدی مسائل پر بات کرنے کے لیے آمادہ ہے۔(کے این او)
