امت نیوز ڈیسک //
نئی دہلی، 26 نومبر : نیشنل انویسٹی گیشن ایجنسی نے دہلی بم دھماکے کے معاملے میں ملیٹنٹ عمر اُن نبی کو پناہ دینے کے الزام میں فریدآباد کے رہائشی کو گرفتار کر لیا ہے۔
بیان کے مطابق، "دھوج، فریدآباد (ہریانہ) کے رہائشی سوئب کو اس کیس میں ساتواں ملزم کے طور پر گرفتار کیا گیا ہے۔”
بیان میں کہا گیا کہ این آئی اے کی تحقیقات سے یہ بات سامنے آئی ہے کہ اس نے 10 نومبر کو ہونے والے کار بم دھماکے سے قبل ملیٹنٹ عمر کو لاجسٹک معاونت بھی فراہم کی تھی۔ اس دھماکے میں کئی افراد جاں بحق اور متعدد زخمی ہوئے تھے، جو کہ قومی دارالحکومت میں لال قلعے کے باہر پیش آیا۔
بیان میں مزید کہا گیا کہ NIA نے اس کیس RC-21/2025/NIA/DLI میں اب تک عمر کے چھ قریبی معاونین کو گرفتار کیا ہے۔
ایجنسی کے مطابق، خودکش حملے سے جڑے مختلف پہلوؤں پر تفتیش جاری ہے اور ریاستی پولیس فورسز کے ساتھ تال میل کے ذریعے ملک کی مختلف ریاستوں میں چھاپے مارے جا رہے ہیں تاکہ اس ہولناک حملے میں ملوث دیگر افراد کی شناخت اور گرفتاری کو یقینی بنایا جا سکے۔
بیان کے مطابق، جان لیوا حملے کی مکمل سازش کو بے نقاب کرنے کی کوششیں جاری ہیں—(کے این او)
