امت نیوز ڈیسک //
کنگن، یکم فروری : گاندربل ضلع کے تھیون کنگن علاقے میں پاور کینال میں گر کر لاپتہ ہونے والے نوجوان کی لاش اتوار کے روز برآمد کر لی گئی، حکام نے بتایا۔
ہفتہ کی شام دیر گئے ممتا ز احمد ٹڈوا اور تنویر احمد ٹڈوا، ساکنان تھیون کنگن، پاور کینال میں گر گئے تھے۔ واقعے کے فوراً بعد ممتا ز احمد ٹڈوا کو کینال سے بحفاظت نکال لیا گیا اور علاج کے لیے ٹراما ہسپتال کنگن منتقل کیا گیا۔
حکام کے مطابق تنویر احمد ٹڈوا اپنے بھائی کو بچانے کی کوشش میں کینال میں داخل ہوا، تاہم تیز بہاؤ کے باعث وہ بہہ گیا اور لاپتہ ہو گیا تھا۔
واقعے کے بعد پولیس اور اسٹیٹ ڈیزاسٹر رسپانس فورس (ایس ڈی آر ایف) کی ٹیموں نے فوری طور پر تلاش مہم شروع کی۔ مسلسل کوششوں کے بعد اتوار کے روز تنویر احمد ٹڈوا کی لاش کینال سے برآمد کر لی گئی، جس کے ساتھ ہی تلاش آپریشن ختم کر دیا گیا۔
ٹراما ہسپتال کنگن کے ڈاکٹروں کے مطابق ممتا ز احمد ٹڈوا کو دل کا دورہ پڑا تھا، جس کے باعث وہ بے ہوش ہو کر کینال میں گر گئے تھے۔ ان کی حالت مستحکم بتائی جا رہی ہے اور مزید علاج کے لیے انہیں ایس کے آئی ایم ایس صورہ منتقل کیا گیا ہے۔
حکام نے بتایا کہ ریسکیو اور بازیابی کی کارروائی کی نگرانی ایس ڈی پی او کنگن اور ایس ایچ او کنگن سمیت سینئر پولیس افسران نے موقع پر کی۔ [کے این ٹی]
