امت نیوز ڈیسک //
سری نگر، 31 جنوری : پیپلز کانفرنس کے چیئرمین سجاد غنی لون نے ہفتہ کے روز کہا کہ ڈوڈہ سے ایم ایل اے مہراج ملک کے ساتھ ناانصافی کی گئی ہے اور انہیں بغیر کسی مضبوط مقدمے کے حراست میں رکھا گیا ہے۔
صحافیوں سے گفتگو کرتے ہوئے سجاد لون نے کہا کہ وہ مہراج ملک کے ساتھ پوری ہمدردی رکھتے ہیں، کیونکہ وہ خود بھی ماضی میں قید و بند کی صعوبتیں جھیل چکے ہیں۔ انہوں نے کہا، “میں جانتا ہوں کہ جیل کا مطلب کیا ہوتا ہے۔ اگر ان کے خلاف کوئی ٹھوس مقدمہ نہیں ہے تو انہیں قید میں رکھنے کا کوئی جواز نہیں بنتا۔”
سجاد لون نے حکومت سے اپیل کی کہ مہراج ملک کو فوری طور پر رہا کیا جائے تاکہ وہ آئندہ اسمبلی اجلاس میں شرکت کر سکیں اور اپنے حلقہ انتخاب کے عوام کی نمائندگی کر سکیں۔ انہوں نے کہا کہ کسی منتخب عوامی نمائندے کی مسلسل حراست اس کے حلقے کو اس کی جمہوری آواز سے محروم کرتی ہے۔
انہوں نے مزید کہا کہ منتخب نمائندوں کو آزادانہ طور پر کام کرنے کا موقع دینا جمہوریت کی صحت کے لیے ناگزیر ہے اور حکام سے مطالبہ کیا کہ اس معاملے میں بلا تاخیر کارروائی کی جائے۔
