امت نیوز ڈیسک //
سری نگر، 11 فروری: جموں و کشمیر حکومت نے بدھ کے روز قانون ساز اسمبلی کو مطلع کیا کہ یونین ٹیریٹری میں مختلف بجلی شعبہ اسکیموں کے تحت اب تک 12.36 لاکھ سے زائد اسمارٹ میٹر نصب کیے جا چکے ہیں۔
ایم ایل اے وحید الرحمن پرہ کے سوال کے جواب میں حکومت نے بتایا کہ جموں پاور ڈسٹری بیوشن کارپوریشن لمیٹڈ (JPDCL) اور کشمیر پاور ڈسٹری بیوشن کارپوریشن لمیٹڈ (KPDCL) کی جانب سے مجموعی طور پر 12,36,507 اسمارٹ میٹر نصب کیے گئے ہیں۔
سرکاری اعداد و شمار کے مطابق جموں ڈویژن کے دس اضلاع میں 6,27,492 میٹر نصب کیے گئے۔ ضلع وار تفصیل کچھ اس طرح ہے:
جموں (3,04,468)، سانبہ (58,707)، اُدھم پور (57,320)، ڈوڈہ (22,591)، کٹھوعہ (39,237)، کشتواڑ (8,742)، پونچھ (24,902)، رام بن (24,870)، ریاسی (25,674) اور راجوری (60,981)۔
اسی طرح کشمیر ڈویژن میں 6,09,015 اسمارٹ میٹر نصب کیے گئے، جن میں سری نگر (2,39,147)، بڈگام (37,009)، گاندربل (15,427)، بانڈی پورہ (33,728)، بارہمولہ (87,732)، کپواڑہ (24,839)، پلوامہ (50,322)، شوپیاں (18,272)، اننت ناگ (77,943) اور کولگام (24,596) شامل ہیں۔
حکومت نے مزید بتایا کہ جموں ڈویژن کے دس اضلاع میں 11 کے وی فیڈرز پر 1,600 اسمارٹ فیڈر میٹر بھی نصب کیے گئے ہیں۔
اس منصوبے کے نفاذ کے لیے وزارتِ بجلی نے RECPDCL کو پی ایم ڈی پی اور آر ڈی ایس ایس اسکیموں کے تحت جے پی ڈی سی ایل اور کے پی ڈی سی ایل کے لیے پروجیکٹ امپلیمنٹیشن ایجنسی نامزد کیا ہے۔
تنصیب کا کام مختلف کمپنیوں کو سونپا گیا ہے۔ جموں ڈویژن میں ٹیکنو الیکٹرک لمیٹڈ، اینول کیبلز اور جینس پاور سلوشنز لمیٹڈ کام کر رہی ہیں، جبکہ کشمیر ڈویژن میں ٹیکنو الیکٹرک اینڈ انجینئرنگ کمپنی لمیٹڈ اور اینول کیبلز پرائیویٹ لمیٹڈ سمیت دیگر کمپنیاں منصوبہ انجام دے رہی ہیں۔
حکومت نے واضح کیا کہ جموں و کشمیر میں نصب کیے جا رہے اسمارٹ میٹر مخصوص نہیں ہیں بلکہ یہ بیورو آف انڈین اسٹینڈرڈز (BIS) اور سینٹرل الیکٹرسٹی اتھارٹی (CEA) کے مقررہ تکنیکی معیارات کے مطابق ہیں، جو ملک بھر میں یکساں طور پر نافذ ہیں۔
