امت نیوز ڈیسک //
سرینگر، 12 فروری : سرینگر کے علاقے پرُمپورہ میں جمعرات کو ایک دلخراش واقعہ پیش آیا جہاں لکڑی کے بھاری گٹھے گرنے سے دو کمسن بھائی شدید زخمی ہو گئے۔ حادثے میں ایک بچہ جاں بحق جبکہ دوسرا زندگی و موت کی کشمکش میں مبتلا ہے۔
حکام کے مطابق یہ واقعہ اُس وقت پیش آیا جب لکڑی کے ڈھیر اچانک منہدم ہو کر دونوں بھائیوں پر آ گرے اور وہ ان کے نیچے دب گئے۔ مقامی لوگوں نے فوری طور پر دونوں بچوں کو نکال کر قریبی اسپتال منتقل کیا۔
جاں بحق ہونے والے بچے کی شناخت 10 سالہ احران ولد محمد عمران ساکن بوٹ کالونی بمنہ کے طور پر ہوئی ہے۔ ڈاکٹروں نے اسے اسپتال پہنچنے پر مردہ قرار دیا۔
اس کا چھ سالہ بھائی ایہران شدید زخمی ہے اور اسپتال ذرائع کے مطابق اس کی حالت تشویشناک بنی ہوئی ہے اور اس کا علاج جاری ہے۔
پولیس نے واقعے کا نوٹس لے کر تحقیقات شروع کر دی ہیں تاکہ یہ معلوم کیا جا سکے کہ لکڑی کے گٹھے کس طرح گر گئے۔ [کے این ٹی]
