امت نیوز ڈیسک //
سرینگر، یکم مارچ: موجودہ حالات کے پیش نظر پولیس نے اتوار کو میڈیا اداروں، صحافیوں، سوشل میڈیا صارفین، ڈیجیٹل پلیٹ فارمز اور عوام کے نام ایک ایڈوائزری جاری کرتے ہوئے قانون و امان سے متعلق خبروں کی اشاعت اور شیئرنگ میں انتہائی ذمہ داری کا مظاہرہ کرنے کی اپیل کی ہے۔
سرکاری بیان میں کہا گیا ہے کہ عوامی اجتماعات یا سکیورٹی سے متعلق کسی بھی خبر کو نشر یا شائع کرنے سے قبل مستند اور سرکاری ذرائع سے تصدیق کی جائے۔ پولیس نے خبردار کیا کہ افواہوں، غیر مصدقہ اطلاعات یا قیاس آرائیوں پر مبنی مواد کی تشہیر سے غیر ضروری خوف و ہراس پھیل سکتا ہے اور امن عامہ متاثر ہو سکتا ہے۔
پولیس نے میڈیا برادری سے سنسنی خیزی سے گریز کرنے اور درست معلومات کی فراہمی کے لیے صرف سرکاری اپڈیٹس پر انحصار کرنے کی تاکید کی۔ بیان میں کہا گیا کہ حساس اوقات میں ذمہ دار صحافت اور محتاط معلومات کی ترسیل امن و ہم آہنگی برقرار رکھنے کے لیے نہایت ضروری ہے۔
ایڈوائزری میں مزید خبردار کیا گیا کہ غلط معلومات یا افواہیں پھیلانے والے افراد یا اداروں کے خلاف قانون کے تحت سخت کارروائی عمل میں لائی جائے گی۔ عوام سے بھی اپیل کی گئی کہ وہ حکام کے ساتھ تعاون کریں اور امن و امان اور فرقہ وارانہ ہم آہنگی کے تحفظ میں مثبت کردار ادا کریں۔
