امت.نیوز ڈیسک//
جموں، 8 مارچ : جموں و کشمیر کے نائب وزیر اعلیٰ سریندر چودھری نے کہا ہے کہ حکومت ایران میں جاری کشیدگی کے دوران وہاں پھنسے بھارتی شہریوں، خصوصاً جموں و کشمیر کے طلبہ کی صورتحال پر گہری نظر رکھے ہوئے ہے۔
صحافیوں سے گفتگو کرتے ہوئے انہوں نے کہا کہ حکومت متعلقہ حکام کے ساتھ مسلسل رابطے میں ہے تاکہ ایران میں موجود طلبہ اور دیگر بھارتی شہریوں کی سلامتی کو یقینی بنایا جا سکے۔
انہوں نے کہا کہ زمینی صورتحال اس وقت پیچیدہ ہے جس کی وجہ سے فوری طور پر انخلاء ممکن نہیں ہو پا رہا۔
انہوں نے کہا، “ہم وہاں پھنسے طلبہ اور دیگر بھارتی شہریوں، خاص طور پر جموں و کشمیر سے تعلق رکھنے والوں کے بارے میں مسلسل معلومات حاصل کر رہے ہیں۔ ہمیں ان کی سلامتی کی فکر ہے، لیکن موجودہ حالات کے باعث فوری انخلاء ممکن نہیں۔”
نائب وزیر اعلیٰ نے مزید کہا کہ جیسے ہی حالات بہتر ہوں گے حکومت وہاں موجود افراد کو محفوظ طریقے سے واپس لانے کے لیے اقدامات کرے گی۔
کھیلوں کے حوالے سے بات کرتے ہوئے سرندر چودھری نے جموں و کشمیر کرکٹ ٹیم کو رن جی ٹرافی جیتنے پر مبارکباد پیش کی۔ ان کا کہنا تھا کہ اس کامیابی نے پورے خطے کو فخر کا موقع فراہم کیا ہے اور یہ جموں و کشمیر میں کھیلوں کے فروغ کی عکاسی کرتا ہے۔
انہوں نے امید ظاہر کی کہ بھارت ٹی ٹوئنٹی ورلڈ کپ بھی جیتے گا۔ انہوں نے کہا کہ جموں و کشمیر کی ٹیم جلد یہاں پہنچنے والی ہے اور حکومت کی جانب سے ان کا شاندار استقبال کیا جائے گا۔
انہوں نے بتایا کہ وزیر اعلیٰ عمر عبداللہ نے ٹیم کی کامیابی کے اعزاز میں 9 مارچ کو خصوصی عشائیہ کا بھی اہتمام کیا ہے۔
سرندر چودھری نے کہا کہ عمر عبداللہ کی قیادت والی حکومت عوام سے کیے گئے وعدوں کو پورا کرنے اور لوگوں کو درپیش مسائل کم کرنے کے لیے پرعزم ہے۔
