امت نیوز ڈیسک //
ایران نے جمعہ کے روز دعویٰ کیا ہے کہ اس نے وسطی ایران کی فضاؤں میں ایک اور امریکی ایف-35 لائٹننگ II جنگی طیارہ مار گرایا ہے۔ خبر رساں ادارے رائٹرز کے مطابق یہ اطلاع مہر نیوز ایجنسی کے حوالے سے دی گئی ہے، جس میں کہا گیا ہے کہ طیارے کا پائلٹ غالباً زندہ نہیں بچ سکا۔
یہ دعویٰ اس واقعے کے بعد سامنے آیا ہے جب دو ہفتے قبل ایک امریکی ایف-35 مشن کے دوران نشانہ بننے کے بعد ہنگامی طور پر مشرق وسطیٰ میں ایک امریکی اڈے پر اتارا گیا تھا۔ اس وقت امریکی حکام نے بتایا تھا کہ پائلٹ محفوظ رہا اور اس کی حالت مستحکم تھی، جبکہ ایران نے دعویٰ کیا تھا کہ اس کی فضائی دفاعی نظام نے طیارے کو نشانہ بنایا۔
ایف-35 دنیا کے جدید ترین جنگی طیاروں میں شمار ہوتا ہے اور امریکہ اور اس کے اتحادیوں کی فضائی طاقت کا اہم حصہ ہے۔ اس طیارے کی قیمت 100 ملین ڈالر سے زائد ہے اور اسے دنیا کے 19 سے زائد ممالک استعمال یا آرڈر کر چکے ہیں۔
تاحال اس تازہ دعوے کی تصدیق امریکی سینٹرل کمانڈ کی جانب سے نہیں کی گئی ہے۔
