امت نیوز ڈیسک //
سرینگر، 3 اپریل:جموں و کشمیر کے محکمہ داخلہ نے یکم اپریل کو ضلع گاندربل کے علاقے ارہامہ میں پیش آئے ایک انکاؤنٹر میں مقامی شہری کی ہلاکت کے معاملے کی مجسٹریٹ انکوائری کا حکم دے دیا ہے۔
سرکاری ذرائع کے مطابق اس انکاؤنٹر میں راشد احمد مغل ولد مرحوم گل زمان مغل، ساکن چونٹوالیوار لَر، گاندربل جاں بحق ہوئے تھے۔
محکمہ داخلہ کی جانب سے جاری کردہ حکم نامے میں ڈسٹرکٹ مجسٹریٹ گاندربل کو ہدایت دی گئی ہے کہ وہ واقعے کی مکمل، غیر جانبدار اور شفاف تحقیقات کو یقینی بنائیں۔ انکوائری کا مقصد ہلاکت کے تمام حقائق اور واقعے کے تسلسل کو واضح کرنا ہے تاکہ جوابدہی کو یقینی بنایا جا سکے۔
حکام کے مطابق مجسٹریٹ انکوائری سات دن کے اندر مکمل کرکے رپورٹ حکومت کو پیش کرنا ہوگی، جس کے بعد مزید کارروائی عمل میں لائی جائے گی۔
یہ حکم نامہ حکومت کے انڈر سیکریٹری رؤف احمد لون کی جانب سے جاری کیا گیا ہے، جبکہ اس کی نقول ڈائریکٹر جنرل آف پولیس جموں و کشمیر سمیت دیگر اعلیٰ حکام کو بھی ارسال کی گئی ہیں۔
