امت نیوز ڈیسک //
تہران :ایران نے امریکی صدر ٹرمپ جانب سے دی گئی ڈیڈ لائن سے قبل نوجوانوں سے اپیل کی ہے کہ وہ ملک بھر میں بجلی گھروں کے گرد “انسانی زنجیریں” بنا کر ان کا تحفظ کریں۔
رپورٹس کے مطابق ایرانی حکام، خاص طور پر وزارتِ کھیل و امورِ نوجوانان، نے طلبہ، فنکاروں، کھلاڑیوں اور نوجوانوں کو ہدایت دی ہے کہ وہ منگل کے روز دوپہر کے وقت اہم تنصیبات کے اردگرد جمع ہو کر یکجہتی کا مظاہرہ کریں۔
اس اقدام کو ایک علامتی مہم قرار دیا جا رہا ہے جس کا مقصد ممکنہ امریکی حملوں کے خلاف قومی اثاثوں کا تحفظ اور عوامی اتحاد کا اظہار ہے۔
یہ پیش رفت ایسے وقت میں سامنے آئی ہے جب صدر ٹرمپ نے خبردار کیا ہے کہ اگر ایران نے آبنائے ہرمز کو نہ کھولا تو ایران کے بجلی گھروں اور پلوں کو نشانہ بنایا جا سکتا ہے۔
ماہرین کے مطابق اس طرح کے اقدامات خطے میں بڑھتی ہوئی کشیدگی کی عکاسی کرتے ہیں، جبکہ عالمی سطح پر اس صورتحال پر تشویش کا اظہار کیا جا رہا ہے۔
