امت نیوز ڈیسک //
سری نگر: مرکزی حکومت نے جموں و کشمیر کے لیفٹیننٹ گورنر کو عوامی ہنگامی صورتحال اور عوامی تحفظ سے متعلق معاملات میں ٹیلی کام خدمات کی نگرانی، معطلی اور ڈی کرپشن سے متعلق اختیارات تفویض کر دیے ہیں۔
جمعرات کو جاری سرکاری نوٹیفکیشن کے مطابق صدرِ ہند نے ٹیلی کمیونیکیشن ایکٹ 2023 کی دفعہ 20(2) کے تحت جموں و کشمیر میں ریاستی حکومت کے اختیارات لیفٹیننٹ گورنر کو استعمال کرنے کی منظوری دی ہے۔
اس قانون کے تحت انتظامیہ کو قومی سلامتی، عوامی تحفظ یا ہنگامی حالات کے دوران پیغامات کی نگرانی، نشریات روکنے، ڈی کرپشن کے احکامات جاری کرنے اور ٹیلی کام خدمات معطل کرنے کا اختیار حاصل ہوگا۔
گزٹ آف انڈیا میں شائع نوٹیفکیشن کے مطابق یہ اختیارات آئین ہند کے آرٹیکل 239(1) کے تحت صدرِ جمہوریہ کے کنٹرول میں اگلے احکامات تک نافذ رہیں گے۔
