امت نیوز ڈیسک //
سرینگر، 9 جون: وزیر اعلیٰ جموں و کشمیر عمر عبداللہ نے زوجیلا ٹنل کے بریک تھرو کو تاریخی کامیابی قرار دیتے ہوئے کہا کہ اس سے کشمیر اور لداخ کے درمیان سال بھر رابطے کا دیرینہ خواب پورا ہوگا اور لداخ کے عوام کی زندگیوں میں مثبت تبدیلی آئے گی۔
بریک تھرو تقریب سے خطاب کرتے ہوئے انہوں نے کہا کہ کئی دہائیوں سے ہر موسم میں رابطے کی خواہش موجود تھی، لیکن اب یہ خواب حقیقت بنتا دکھائی دے رہا ہے۔ عمر عبداللہ نے کہا کہ سردیوں میں زوجیلا درہ بند ہونے سے طلبہ، مریضوں اور عام لوگوں کو شدید مشکلات کا سامنا کرنا پڑتا تھا، تاہم ٹنل کی تکمیل کے بعد آمد و رفت آسان ہوگی، معاشی سرگرمیوں کو فروغ ملے گا اور دونوں خطوں کے درمیان سماجی و ثقافتی روابط مزید مضبوط ہوں گے۔ انہوں نے مرکزی وزیر نتن گڈکری اور ان کی وزارت کا بھی شکریہ ادا کیا۔
