امت نیوز ڈیسک//
وزیر اعلیٰ عمر عبداللہ نے انڈیا بلاک کے لیڑران سے جموں و کشمیر کو ریاستی درجہ بحال کرنے کی مہم میں تعاون کی اپیل کی ہے۔
نئی دہلی میں منعقدہ انڈیا بلاک اجلاس سے خطاب کرتے ہوئے عمر عبداللہ نے کہا کہ نیشنل کانفرنس آئندہ پارلیمانی مون سون اجلاس کے دوران ریاستی درجے کی بحالی کے مطالبے پر احتجاجی مہم شروع کرے گی۔ انہوں نے اپوزیشن جماعتوں سے اس مہم میں شامل ہونے اور جموں و کشمیر کے عوام کے ساتھ یکجہتی کا اظہار کرنے کی درخواست کی۔
عمر عبداللہ نے اجلاس کو بتایا کہ ریاستی درجے کی بحالی کا مطالبہ کسی ایک سیاسی جماعت کا نہیں بلکہ جموں و کشمیر کے عوام کی ایک وسیع جمہوری خواہش ہے۔ انہوں نے کہا کہ نیشنل کانفرنس مختلف اپوزیشن جماعتوں اور رہنماؤں سے باضابطہ رابطہ کر کے ان کی حمایت حاصل کرے گی۔
واضح رہے کہ نیشنل کانفرنس پہلے ہی پارلیمنٹ کے مون سون اجلاس کے آغاز کے روز نئی دہلی میں احتجاج کرنے کا اعلان کر چکی ہے، جس کا مقصد جموں و کشمیر کے لیے ریاستی درجہ اور آئینی ضمانتوں کی بحالی کا مطالبہ کرنا ہے۔
انڈیا بلاک کے اجلاس میں ملک بھر کی اپوزیشن جماعتوں کے سینئر رہنماؤں نے شرکت کی اور آئندہ پارلیمانی اجلاس سے متعلق مختلف سیاسی امور پر تبادلہ خیال کیا۔
