امت نیوز ڈیسک //
نئی دہلی/تہران، 8 جون: مشرقِ وسطیٰ میں بڑھتی ہوئی کشیدگی اور حالیہ سیکیورٹی صورتحال کے پیش نظر بھارت نے ایران میں مقیم اپنے شہریوں کے لیے نئی سفری ایڈوائزری جاری کرتے ہوئے انہیں جلد از جلد ایران چھوڑنے کی ہدایت دی ہے۔
تہران میں بھارتی سفارت خانے کی جانب سے جاری بیان میں کہا گیا ہے کہ خطے میں تازہ پیش رفت کے باعث تمام بھارتی شہری ایران کا سفر کرنے سے گریز کریں، جبکہ ایران میں موجود افراد دستیاب سفری ذرائع استعمال کرتے ہوئے فوری طور پر ملک چھوڑنے کی کوشش کریں۔
سفارت خانے نے اپنی سابقہ ہدایات کو دہراتے ہوئے کہا ہے کہ بھارتی شہری اپنی سلامتی کو اولین ترجیح دیں اور صورتحال پر مسلسل نظر رکھیں۔
بیان میں کہا گیا، "خطے میں حالیہ پیش رفت کے پیش نظر سفارت خانہ تمام بھارتی شہریوں کو ایران کا سفر نہ کرنے کا مشورہ دیتا ہے۔ ایران میں موجود بھارتی شہریوں کو بھی دستیاب سفری ذرائع کے ذریعے جلد از جلد ملک چھوڑنے کی ہدایت کی جاتی ہے۔”
یہ ایڈوائزری ایران میں مقیم تمام بھارتی شہریوں، بشمول طلبہ، تاجروں، زائرین اور سیاحوں پر لاگو ہوگی۔ ایران، اسرائیل اور امریکہ کے درمیان جاری کشیدگی کے دوران یہ بھارت کی جانب سے جاری کی جانے والی آٹھویں سفری ہدایت ہے۔
یاد رہے کہ اپریل میں جنگ بندی کے اعلان کے فوراً بعد بھی بھارتی سفارت خانے نے اپنے شہریوں کو جلد از جلد ایران چھوڑنے کا مشورہ دیا تھا اور انخلا کے عمل کو تیز کرنے کے لیے ہیلپ لائن بھی قائم کی گئی تھی۔
اطلاعات کے مطابق اب بھی تقریباً 7,500 بھارتی شہری ایران میں موجود ہیں۔ بھارتی سفارت خانہ اس سے قبل ہزاروں شہریوں کے انخلا میں مدد فراہم کر چکا ہے، جنہیں آرمینیا اور آذربائیجان کے زمینی راستوں کے ذریعے محفوظ مقامات تک پہنچایا گیا تھا۔
بھارتی حکومت کا کہنا ہے کہ وہ خطے کی صورتحال پر مسلسل نظر رکھے ہوئے ہے اور اپنے شہریوں کی سلامتی کو یقینی بنانے کے لیے تمام ضروری اقدامات جاری رکھے ہوئے ہے۔
