امت نیوز ڈیسک //
سری نگر، 12 جون: وسطی کشمیر کے ضلع بڈگام کے چاڈورہ علاقے میں جمعہ کو ایک افسوسناک سڑک حادثے میں اسکول بس کا ڈرائیور جاں بحق جبکہ دو طلبہ زخمی ہو گئے۔
حکام کے مطابق آئی پی ٹی ایس اسکول خانصاحب کی ایک اسکول بس برینوار کے نیگو جباد علاقے میں بے قابو ہو کر گہری کھائی میں جا گری۔ حادثے کے نتیجے میں ڈرائیور موقع پر ہی دم توڑ گیا، جبکہ بس میں سوار دو طلبہ زخمی ہو گئے۔
زخمی طلبہ کو فوری طور پر علاج کے لیے سب ڈسٹرکٹ اسپتال چاڈورہ منتقل کیا گیا، جہاں ان کی طبی دیکھ بھال جاری ہے۔
حادثے کی اطلاع ملتے ہی مقامی لوگ، پولیس اور ریسکیو ٹیمیں جائے وقوعہ پر پہنچ گئیں اور امدادی کارروائیاں انجام دیں۔
پولیس نے واقعے کا نوٹس لیتے ہوئے تحقیقات شروع کر دی ہیں۔ جاں بحق ڈرائیور کی شناخت معلوم کرنے کی کارروائی بھی جاری ہے۔(کے این او)
