امت نیوز ڈیسک //
سرینگر، 11 جون: جموں و کشمیر کے وزیر اعلیٰ عمر عبداللہ نے جمعرات کو مودی سے نئی دہلی میں ملاقات کی اور جموں و کشمیر سے متعلق اہم امور پر تبادلۂ خیال کیا۔
عمر عبداللہ نے سوشل میڈیا پلیٹ فارم ایکس پر بتایا کہ ملاقات کے دوران جموں و کشمیر کو جلد از جلد ریاستی درجہ بحال کرنے، معیشت کی موجودہ صورتحال، ترقیاتی کاموں کی رفتار اور سیاحت کے فروغ جیسے اہم مسائل پر تفصیلی گفتگو ہوئی۔
انہوں نے اپنی پوسٹ میں لکھا کہ انہوں نے وزیر اعظم کے ساتھ جموں و کشمیر کے عوام سے جڑے اہم معاملات اٹھائے اور ریاستی درجہ کی جلد بحالی پر زور دیا۔
وزیر اعلیٰ نے وزیر اعظم نریندر مودی کو مسلسل 12 سال تک ملک کی قیادت کرنے پر مبارکباد بھی پیش کی۔
ادھر وزیر اعلیٰ کے دفتر کی جانب سے جاری بیان میں کہا گیا کہ ملاقات کے دوران جموں و کشمیر کی اقتصادی ترقی، رابطہ سڑکوں اور بنیادی ڈھانچے کی بہتری، روزگار کے مواقع پیدا کرنے اور عوامی فلاح و بہبود کے منصوبوں پر بھی بات چیت کی گئی۔ عمر عبداللہ نے خطے کی ترقی کی رفتار کو تیز کرنے کے لیے مرکزی حکومت کی مسلسل معاونت کی ضرورت پر زور دیا۔
واضح رہے کہ جموں و کشمیر میں اگست 2019 میں ریاست کی خصوصی حیثیت ختم کیے جانے اور تنظیمِ نو کے بعد سے این سی کی قیادت والی حکومت مسلسل مکمل ریاستی درجہ بحال کرنے کا مطالبہ کرتی آ رہی ہے۔
