امت نیوز ڈیسک //
سری نگر، 13 جون: ڈائریکٹوریٹ آف اسکول ایجوکیشن کشمیر نے محرم الحرام کے پیشِ نظر وادی کشمیر کے تمام سرکاری اور تسلیم شدہ نجی اسکولوں کو ہدایت جاری کی ہے کہ 23 جون سے 27 جون 2026 تک کسی بھی قسم کے داخلی امتحانات، اندرونِ ادارہ جائزوں یا ٹرم امتحانات کا انعقاد نہ کیا جائے۔
ڈائریکٹر اسکول ایجوکیشن کشمیر کی جانب سے جاری کردہ حکم نامے کے مطابق یہ فیصلہ محرم الحرام کی آمد کے پیشِ نظر لیا گیا ہے تاکہ طلبہ اور عوام مذہبی سرگرمیوں میں آسانی سے شرکت کر سکیں۔
حکم نامے میں واضح کیا گیا ہے کہ تمام سرکاری اور نجی تسلیم شدہ اسکول 23 جون سے 27 جون 2026 تک کسی بھی جماعت کے طلبہ کے لیے امتحانات یا داخلی جائزوں کا انعقاد نہیں کریں گے۔
ڈائریکٹوریٹ نے خبردار کیا ہے کہ جاری کردہ ہدایات کی خلاف ورزی یا عدم تعمیل کی صورت میں متعلقہ اداروں کے خلاف قواعد و ضوابط کے تحت تادیبی کارروائی عمل میں لائی جائے گی۔
