امت نیوز ڈیسک //
نئی دہلی: معروف ماحولیاتی کارکن سونم وانگچک آج سے دارالحکومت نئی دہلی کے جنتر منتر پر غیر معینہ مدت کی بھوک ہڑتال شروع کر رہے ہیں۔ ان کا کہنا ہے کہ ملک میں تعلیمی نظام میں اصلاحات، امتحانی بے ضابطگیوں کے خلاف سخت کارروائی اور پیپر لیک معاملات میں جوابدہی کو یقینی بنانے کے لیے یہ قدم اٹھایا جا رہا ہے۔
اس بھوک ہڑتال میں آل انڈیا اسٹوڈنٹس ایسوسی ایشن کے متعدد طلبہ رہنما بھی شریک ہوں گے۔ دوسری جانب ملک بھر کی 650 سے زائد کسان تنظیموں نے بھی اس تحریک کی حمایت کا اعلان کیا ہے، جس کے باعث احتجاج مزید زور پکڑنے کا امکان ہے۔
تحریک کے منتظمین کا الزام ہے کہ حکومت نے امتحانی بے ضابطگیوں اور طلبہ کے مطالبات پر کوئی مؤثر اقدام نہیں کیا، جس کے بعد بھوک ہڑتال شروع کرنے کا فیصلہ کیا گیا۔
مظاہرین کے اہم مطالبات میں مرکزی وزیر تعلیم دھرمیندر پردھان کا استعفیٰ، پیپر لیک کے تمام ملزمان کی گرفتاری، امتحانی نظام میں شفافیت، تعلیمی اصلاحات اور طلبہ کے مستقبل کا تحفظ شامل ہیں۔ احتجاجی رہنماؤں کا کہنا ہے کہ مطالبات تسلیم ہونے تک ان کی تحریک جاری رہے گی۔
