امت نیوز ڈیسک //
نئی دہلی: بھارتی وزارتِ خارجہ نے اتوار کو بتایا کہ عمان کے ساحل کے قریب حملے کا نشانہ بننے والے تجارتی جہاز جی ایف ایس گلیکسی پر سوار 11 بھارتی شہریوں میں سے 10 کو بحفاظت بچا لیا گیا ہے، جبکہ ایک بھارتی ملاح اب بھی لاپتا ہے۔ اس کی تلاش کے لیے امدادی کارروائیاں جاری ہیں۔
وزارتِ خارجہ کے مطابق عمان میں بھارتی سفارت خانہ مقامی حکام کے ساتھ مسلسل رابطے میں ہے اور تلاش و بچاؤ کی کارروائیوں کی نگرانی کر رہا ہے۔ حکومتِ ہند نے امدادی کارروائیوں میں تعاون پر عمانی حکام کا شکریہ بھی ادا کیا۔
بھارت نے تجارتی جہاز پر حملے کی شدید مذمت کرتے ہوئے کہا کہ خطے میں تجارتی جہازوں کو مسلسل نشانہ بنایا جانا انتہائی تشویش ناک ہے۔ وزارت نے زور دیا کہ مشرقِ وسطیٰ میں بڑھتی ہوئی کشیدگی کو فوری طور پر کم کیا جائے، جاری سفارتی مذاکرات کو کامیاب بنایا جائے اور خطے میں امن و استحکام بحال کیا جائے۔
بیان میں کہا گیا کہ بین الاقوامی آبی گزرگاہوں میں تجارتی جہازوں اور شہری تنصیبات کو نشانہ بنانے کا سلسلہ فوری طور پر بند ہونا چاہیے تاکہ عالمی تجارت اور جہاز رانی بین الاقوامی قوانین کے مطابق بلا رکاوٹ جاری رہ سکے۔
ادھر آبنائے ہرمز میں ایک تجارتی جہاز پر حملے کے بعد امریکہ نے ایران پر کارروائی کی، جس کے جواب میں ایران نے بحرین، کویت، قطر، متحدہ عرب امارات اور عمان کی جانب حملے کیے۔ ان تازہ جھڑپوں کے باعث خطے میں کشیدگی مزید بڑھ گئی ہے۔
آبنائے ہرمز اس وقت ایران اور امریکہ کے درمیان جاری سفارتی مذاکرات کا اہم ترین موضوع بن چکی ہے۔ ایران اور عمان نے اس حساس آبی راستے کے مستقبل پر تکنیکی اور سیاسی سطح پر مذاکرات جاری رکھنے پر اتفاق کیا ہے۔
