امت نیوز ڈیسک ///
ڈوڈہ، 17 جولائی: جموں و کشمیر کے ضلع ڈوڈہ میں جمعرات کی رات پیش آئے ایک فائرنگ کے واقعے میں ایک شخص ہلاک جبکہ اسپیشل آپریشنز گروپ (ایس او جی) کے تین اہلکار زخمی ہو گئے۔
پولیس کے مطابق ایس او جی کی ایک ٹیم کو جائی-گنڈوہ روڈ پر مشتبہ نقل و حرکت کی اطلاع ملی تھی، جس کے بعد علاقے میں گھات لگا کر نگرانی کی جا رہی تھی۔ رات تقریباً 11:30 بجے ٹیم نے ایک مشتبہ شخص کو روکنے کی کوشش کی۔
حکام کا کہنا ہے کہ اس دوران مبینہ طور پر مذکورہ شخص نے اہلکاروں پر حملہ کیا اور ایک سرکاری رائفل چھیننے کی کوشش کی، جس کے نتیجے میں ہاتھا پائی شروع ہو گئی۔ اسی دوران ایک ایس او جی اہلکار نے فائرنگ کی، جس سے 30 سالہ عارف حسین، ساکن چیکا گاؤں، شدید زخمی ہو گیا، جبکہ تین پولیس اہلکار بھی زخمی ہوئے۔
تمام زخمیوں کو پہلے سب ڈسٹرکٹ اسپتال بھدرواہ منتقل کیا گیا، جہاں سے انہیں مزید علاج کے لیے گورنمنٹ میڈیکل کالج ڈوڈہ ریفر کیا گیا۔ عارف حسین دورانِ علاج زخموں کی تاب نہ لاتے ہوئے دم توڑ گیا۔
واقعے کے بعد پولیس نے ایک مذہبی مبلغ کو پوچھ گچھ کے لیے حراست میں لیا ہے، تاہم حکام کے مطابق ابھی تک اس کا واقعے سے تعلق ثابت نہیں ہوا ہے اور تحقیقات جاری ہیں۔
احتیاطی اقدام کے طور پر بھدرواہ شہر میں پولیس اور سینٹرل ریزرو پولیس فورس (سی آر پی ایف) کی اضافی نفری تعینات کر دی گئی ہے، جبکہ بھارتی فوج نے جائی علاقے میں سرچ آپریشن بھی شروع کر دیا ہے۔
پولیس کا کہنا ہے کہ واقعے کی تمام پہلوؤں سے تحقیقات کی جا رہی ہیں اور مزید معلومات سامنے آنے پر فراہم کی جائیں گی۔
