امت نیوز ڈیسک //
بارہمولہ، 16 جولائی: ضلع پولیس ہیڈکوارٹر بارہمولہ نے وی وی آئی پی اور وی آئی پی دوروں، مذہبی اجتماعات، عوامی تقریبات اور دیگر ایسے مواقع جہاں پولیس تعینات ہو، وہاں میڈیا نمائندوں کے لیے ضلع اطلاعاتی افسر (ڈی آئی او) بارہمولہ کی جانب سے جاری کردہ درست شناختی کارڈ ساتھ رکھنا لازمی قرار دیا ہے۔
سرکاری حکم نامے کے مطابق صرف وہی صحافی، فوٹو جرنلسٹ اور دیگر میڈیا نمائندے تقریبات کے مقامات، میڈیا انکلوژر، پولیس تعیناتی کے علاقوں اور دیگر محدود مقامات تک رسائی حاصل کر سکیں گے جن کے پاس ڈی آئی او بارہمولہ کی جانب سے جاری کردہ کارآمد شناختی کارڈ موجود ہوگا۔
حکم نامے میں تمام پولیس افسران اور اہلکاروں کو ہدایت دی گئی ہے کہ وہ تمام داخلی راستوں اور چیکنگ پوائنٹس پر میڈیا نمائندوں کی اسناد کی سختی سے جانچ کریں۔
حکم کے مطابق پرنٹ، الیکٹرانک، ڈیجیٹل یا سوشل میڈیا سے وابستگی کا دعویٰ کرنے والے کسی بھی فرد کو اس وقت تک داخلے کی اجازت نہیں دی جائے گی جب تک وہ ڈی آئی او بارہمولہ کی جانب سے جاری کردہ درست شناختی کارڈ پیش نہ کرے۔
ضلع پولیس نے نگران افسران کو بھی اس حکم پر سختی سے عمل درآمد یقینی بنانے کی ہدایت دی ہے اور واضح کیا ہے کہ کسی بھی خلاف ورزی یا غیر مجاز رسائی کو سنجیدگی سے لیا جائے گا۔
یہ حکم فوری طور پر نافذ العمل ہو گیا ہے اور آئندہ احکامات جاری ہونے تک مؤثر رہے گا۔
