امت نیوز ڈیسک //
سری نگر، 16 جولائی: پیپلز ڈیموکریٹک پارٹی (پی ڈی پی) کی صدر اور سابق وزیر اعلیٰ محبوبہ مفتی نے جموں و کشمیر کرکٹ ایسوسی ایشن (جے کے سی اے) میں حالیہ پیش رفت پر تشویش کا اظہار کرتے ہوئے بورڈ آف کنٹرول فار کرکٹ اِن انڈیا (بی سی سی آئی) سے فوری مداخلت کی اپیل کی ہے۔
سماجی رابطے کی ویب سائٹ پر جاری اپنے بیان میں محبوبہ مفتی نے کہا کہ جموں و کشمیر کرکٹ ایسوسی ایشن کو سیاست، بدعنوانی اور علاقائی تعصب سے بالاتر رہنا چاہیے۔ انہوں نے کہا کہ انہیں بی سی سی آئی کے صدر متھن منہاس کی قیادت میں بہتر طرزِ عمل کی امید تھی۔
انہوں نے الزام عائد کیا کہ جمہوری طریقے سے منتخب ہونے والے جے کے سی اے کے صدر جاوید خطیب اور متعدد مقامی کرکٹ کلبوں کو مناسب قانونی عمل کے بغیر نظرانداز کیا جا رہا ہے۔ ان کا دعویٰ تھا کہ بعض کشمیری کرکٹ کلبوں کو ان کی کشمیری شناخت کی بنیاد پر نشانہ بنایا جا رہا ہے اور انہیں ایسوسی ایشن سے باہر کیا جا رہا ہے۔
محبوبہ مفتی نے خبردار کیا کہ کرکٹ کو جموں اور کشمیر کے درمیان علاقائی تقسیم کا ذریعہ نہیں بننے دینا چاہیے۔ انہوں نے کہا، "کرکٹ میں شناخت نہیں بلکہ صلاحیت کی بنیاد پر یہ فیصلہ ہونا چاہیے کہ کون بھارت کی نمائندگی کرے۔”
انہوں نے بی سی سی آئی اور اس کے عہدیداروں سے مطالبہ کیا کہ وہ اس معاملے میں مداخلت کریں، جموں و کشمیر کرکٹ ایسوسی ایشن کے معاملات میں شفافیت اور ضابطے کے مطابق کارروائی کو یقینی بنائیں اور کرکٹ کے وقار کا تحفظ کریں۔
