امت نیوز ڈیسک //
سرینگر، 25 جولائی: جموں و کشمیر میں مسلسل بارشوں، بادل پھٹنے کے واقعات اور اس کے نتیجے میں جانی و مالی نقصان کے پیش نظر پیپلز ڈیموکریٹک پارٹی (پی ڈی پی) نے 28 جولائی کو ہونے والی اپنی یومِ تاسیس کی تقریبات ملتوی کرنے کا اعلان کیا ہے۔
پارٹی کی جانب سے جاری بیان میں کہا گیا کہ پی ڈی پی صدر محبوبہ مفتی کی ہدایت پر یہ فیصلہ کیا گیا ہے۔ بیان کے مطابق مسلسل بارشوں کے باعث جموں و کشمیر کے مختلف علاقوں میں قیمتی انسانی جانوں کا نقصان ہوا ہے جبکہ املاک کو بھی بڑے پیمانے پر نقصان پہنچا ہے، جس کے باعث اس وقت تقریبات کا انعقاد مناسب نہیں۔
پی ڈی پی نے قدرتی آفات سے متاثرہ خاندانوں کے ساتھ یکجہتی کا اظہار کرتے ہوئے کہا کہ پارٹی اس مشکل گھڑی میں جموں و کشمیر کے عوام کے ساتھ کھڑی ہے، بالخصوص راجوری اور پونچھ کے ان خاندانوں کے ساتھ جنہوں نے حالیہ بادل پھٹنے کے واقعات میں اپنے عزیزوں کو کھو دیا۔
پارٹی نے کہا کہ یومِ تاسیس کی تقریبات کی نئی تاریخ کا اعلان بعد میں کیا جائے گا۔
