امت نیوز ڈیسک //
بیرواہ، 24 جولائی: جموں و کشمیر کے لیفٹیننٹ گورنر منوج سنہا نے جمعہ کے روز بیرواہ کے علاقے لولی پورہ میں ہیڈ کانسٹیبل عاشق حسین کی رہائش گاہ پر پہنچ کر ان کے اہلِ خانہ سے تعزیت کا اظہار کیا۔ ہیڈ کانسٹیبل عاشق حسین حالیہ اننت ناگ حملے میں فرائض کی انجام دہی کے دوران مارےگئے تھے۔
لیفٹیننٹ گورنر نے سوگوار خاندان سے دلی ہمدردی کا اظہار کرتے ہوئے یقین دلایا کہ جموں و کشمیر انتظامیہ اس مشکل گھڑی میں ان کے ساتھ کھڑی ہے اور ہر ممکن مدد و تعاون فراہم کیا جائے گا۔
اس موقع پر منوج سنہا نے پولیس اہلکار کی بہادری، فرض شناسی اور عظیم قربانی کو خراجِ عقیدت پیش کرتے ہوئے ان کی مغفرت اور درجات کی بلندی کے لیے دعا بھی کی۔
لیفٹیننٹ گورنر کے ہمراہ ڈائریکٹر جنرل پولیس نالین پربھات، انسپکٹر جنرل پولیس کشمیر وی کے بردی، ڈپٹی انسپکٹر جنرل سینٹرل کشمیر راجیو اوم پرکاش پانڈے، ایس ایس پی بڈگام ہری پرساد کے کے اور ڈپٹی کمشنر بڈگام اطہر عامر خان بھی موجود تھے۔
واضح رہے کہ ہیڈ کانسٹیبل عاشق حسین کو بدھ کے روز اننت ناگ کے لال چوک علاقے میں ڈیوٹی کے دوران نامعلوم ملی ٹینٹوں نے قریب سے گولیاں مار کر قتل کر دیا تھا۔
