امت نیوز ڈیسک //
سرینگر: جموں کشمیر کے زرعی شعبے میں اسرائیل اپنی ٹیکنالوجی کے ذریعے سرمایہ کاری کرنے میں دلچسپی کا مظاہرہ کر رہا ہے۔ اسرائیل جموں اور کشمیر میں زرعی شعبے میں دو سینٹر آف اکسیلنسCentre’s of) Excellence) قائم کرنے جا رہا ہے جس ضمن میں اسرائیل کے عہدیداروں نے جموں کشمیر کے زرعی محکمے کے عہدیداروں کے ساتھ گفتگو کی ہے۔
یہ سینٹرز اسرائیل اور بھارت کے مابین انڈو اسرائیل ایگریکلچر پروجیکٹ کے تحت کھولے جائیں گے۔ جموں کشمیر کے زرعی محکمہ کے ایک عہدیدار نے ای ٹی وی بھارت کو نام مخفی رکھنے کے شرط پر بتایا کہ گزشتہ ہفتے اسرائیل سفارتخانہ کے ایگریکلچر اٹیچی یائیر اشل نے محکمہ کے عہدیداروں بشمول ایڈیشنل چیف سیکریٹری محکمہ زراعت اتل ڈلو، ڈائریکٹر زراعت جموں کشمیر کے کے شرما، اقبال چودھری اور دیگر افسران کے ساتھ جموں میں ملاقات کی۔
میٹنگ میں شرکت کرنے والے ایک عہدیدار نے ای ٹی وی بھارت کو بتایا کہ یہ منصوبہ فیڈ بیک سٹیج پر ہے اور اسرائیل کے عہدیدار نے یہاں کے زرعی شعبے میں ٹیکنالوجی کے ذریعے سرمایہ کاری کرنے میں دلچسپی دکھائی ہے۔
انکا کہنا تھا کہ میٹنگ کے بعد یائیر اشل نے جموں اور کشمیر میں کچھ زرعی علاقوں کا بھی دورہ کیا ہے۔ انکا کہنا تھا کہ اسرائیلی عہدیدار نے کہا کہ جموں کشمیر میں زراعت شعبے کو ٹیکنالوجی کے ذریعے تقویت اور جدیدیت لانے میں کافی سکوپ ہے اور اسرائیل اس میں ضرور تعاون کرے گا۔
