امت نیوز ڈیسک //
سری نگر، 26 جنوری:پیپلز ڈیموکریٹک پارٹی (پی ڈی پی) کی صدر اور سابق وزیر اعلیٰ محبوبہ مفتی نے کہا ہے کہ یومِ جمہوریہ کو صرف پریڈز اور تقاریر تک محدود نہیں رکھا جانا چاہیے بلکہ اس دن آئینِ ہند کی بالادستی اور اس کے تحفظ کو یقینی بنانا ناگزیر ہے۔
محبوبہ مفتی نے پیر کے روز بخشی اسٹیڈیم میں منعقدہ یومِ جمہوریہ کی تقریب میں شرکت کے موقع پر کہا کہ 15 اگست 1947 نے ہمیں نوآبادیاتی غلامی سے آزادی دلائی، جبکہ 26 جنوری 1950 نے ہمیں آئینی حقوق عطا کیے جن کے تحت ہم عزت و وقار کے ساتھ زندگی گزار سکتے ہیں۔
انہوں نے سوشل میڈیا پلیٹ فارم ایکس (سابقہ ٹوئٹر) پر اپنی پوسٹ میں کہا کہ آئین نے ہمیں اظہارِ رائے، مذہبی آزادی اور سب سے بڑھ کر ووٹ دینے کا حق دیا ہے، جو جمہوریت کی بنیاد ہے۔
محبوبہ مفتی نے مزید کہا کہ آئین نے ملک میں مضبوط ادارے قائم کیے، تاہم افسوس کا مقام ہے کہ ان میں سے بعض اداروں کو آج ہندوستان کے بنیادی نظریے کو کمزور کرنے کے لیے استعمال کیا جا رہا ہے۔
واضح رہے کہ سابق وزیر اعلیٰ نے سری نگر کے بخشی اسٹیڈیم میں منعقدہ سرکاری یومِ جمہوریہ تقریب میں شرکت کی۔
