امت نیوز ڈیسک //
سرینگر (جموں و کشمیر):رکن پارلیمان اور جموں و کشمیر کے سابق وزیر اعلیٰ ڈاکٹر فاروق عبداللہ نے ہفتے کے روز دعویٰ کیا کہ ’’جب جموں و کشمیر میں عوامی حکومت آئے گی تب شیعہ عزاداروں کا جلوس شہر کے آبی گزر سے برآمد ہوگا۔‘‘ سرینگر کے جڈی بل علاقے میں یوم عاشورہ کے موقع پر ذوالجناح کے جلوس میں شرکت کرنے کے بعد فاروق عبداللہ نے صحافیوں سے بات کرتے ہوئے کہا: ’’ہم بھی چاہتے تھے کہ یہ جلوس دوبارہ سے شروع ہو لیکن ہمارے ہی کچھ لوگ تھے جو اس جلوس کے خلاف تھے۔ میں اُن کا نام نہیں لینا چاہتا کیوں کہ اُن لوگوں کا انتقال ہو چکا ہے۔‘‘
فاروق عبداللہ کا مزید کہنا تھا کہ’’مجھے یاد ہے کہ اس جلوس میں سب شرکت کرتے تھے۔ میں خود ذوالجناح کی لگام پکڑ کے چلا کرتا تھا۔ میں آپ کو یقین دلانا چاہتا ہوں کہ جب یہاں عوامی حکومت آئے گی تو یہ جلوس دوبارہ آبی گزر سے برآمد ہوگا۔‘‘ اس موقع پر انہوں نے عزاداروں سے گفتگو بھی کی اور اسلامی ممالک کے لیے دعا کرتے ہوئے عوام سے بھی گزارش کی کہ وہ بھی خدا کے حضور دعا کریں۔
منی پور میں شرمسار دینے والے واقعہ پر اپنا ردعمل ظاہر کرتے ہوئے سابق وزیر اعلیٰ نے کہا کہ ’’مخالف جماعتوں کا ایک وفد آج منی پور کے لیے روانہ ہوا ہے۔ وہ واپس آئے گا اور پیر کو ہمیں اُن سے بھی معلوم ہوگا کہ وہاں حالات کیسے ہیں۔ ہم چاہتے ہیں کہ وہاں امن آئے، جو وہاں رہتے ہیں وہ امن سے زندگی گزار سکیں۔ ‘‘فاروق عبداللہ کا مزید کہنا تھا کہ ’’جو مذہبی لڑائی وہاں شروع کی گئی ہے، اس کو بند کیا جائے۔ ہم سب کو ایک ساتھ چلنے کی کوشش کرنی چاہیے، تب ہی یہ مسئلہ حل ہو سکتا ہے۔ آپ نے وہاں کا ویڈیو دیکھا ہوگا، میں نہیں دیکھ پایا۔ جہاں ہماری بہنوں کو ننگا نچایا گیا، اُن کی عصمت دری کی گئی، اُنہیں مارا گیا اور نہ جانے کتنے اور مر رہے ہوں گے وہاں۔ ہم اُمید کرتے ہیں کہ وزیر اعظم پارلیمنٹ میں اس حوالے سے بیان دیں گے۔
