امت نیوز ڈیسک //
سرینگر: جموں و کشمیر کی سرمائی دارالحکومت جموں کی ایک عدالت نے منگل کے روز منی لانڈرنگ معاملے میں سابقہ ریاست کے سابق وزیر لال سنگھ کی انفورسمنٹ ڈائریکٹوریٹ (ای ڈی) کی حراست میں مزید پانچ دن کی توسیع کر دی ہے۔
ڈوگرہ سوابھیمان سنگٹھن پارٹی (ڈی ایس ایس پی) کے صدر سنگھ کو سات نومبر کو جموں کی سینک کالونی کے چاوڑی علاقے کے ایک گھر سے اس وقت گرفتار کیا گیا جب خصوصی عدالت نے اس کی پیشگی ضمانت کی درخواست خارج کردی۔
سنگھ کی اہلیہ اور سابق رکن اسمبلی کانتا اندوترا کے ذریعہ چلائے جانے والے ایجوکیشن ٹرسٹ کے خلاف ایک معاملے کے سلسلے میں ای ڈی کے ذریعہ ان کی جانچ کی جارہی ہے۔
اس حوالے سے بات کرتے ہوئے اسپیشل پبلک پراسیکیوٹر اشونی کھجوریا نے بتایا کہ سنگھ کو سات دن کی ریمانڈ کی میعاد ختم ہونے پر منگل کو ویڈیو کانفرنس کے ذریعے خصوصی عدالت میں پیش کیا گیا۔
عدالت کے فرمان کا حوالہ دیتے ہوئے کھجوریا کا کہنا تھا کہ "معاملے کی تفتیش ابتدائی مرحلے میں ہے۔ ملزم ایک سنگین اور غیر ضمانتی جرم میں ملوث ہے، اسے 14 سے 18 نومبر تک پانچ دن کی مدت کے لیے ای ڈی کی حراست میں بھیج دیا گیا۔
اس کے علاوہ عدالت نے ای ڈی کو 18 نومبر کو ورچوئل موڈ کے ذریعے ملزم (سنگھ) کو پیش کرنے کا حکم دیا اور تفتیشی افسر کو جانچ میں تیزی لانے کی ہدایت کی۔
