امت نیوز ڈیسک //
اننت ناگ (جموں کشمیر) :جنوبی کشمیر کے اننت ناگ ضلع میں ڈاکٹروں نے ایک مریضہ کے جسم سے دنیا کا سب سے بڑا اپینڈیکس کامیابی سے نکالنے کا دعویٰ کیا ہے۔ یہ جراحی ضلع کے نجی اسپتال ’’الحیات‘‘ میں ایک سرجن ڈاکٹر ملک آزاد نے انجام دی۔ ڈاکٹر نے دعویٰ کیا کہ کتابوں میں اب تک کے سب سے لمبے اپینڈیکس کا سائز 22سینٹی میٹر درج ہے تاہم 20سالہ خاتون کے جسم سے انہوں نے 23.7سنٹی میٹر اپینڈکس کامیابی سے نکالا ہے جو اب ایک نیا ریکارڈ ہے۔
انہوں نے اس ضمن میں مزید تفصیلات فراہم کرتے ہوئے کہا کہ عام طور پر ایک انسان کے جسم میں سات سے گیارہ سنٹی میٹر طویل اپینڈکس ہوتا ہے اور تاہم کتابوں میں انہوں نے پڑھا ہے کہ اب تک دنیا میں سب سے طویل اپینڈکس 22سینٹی میٹر درج ہے جو ایک افریکی ملک میں ایک مریض کے جسم سے نکالا گیا تھا۔ انہوں نے مزید کہا کہ جراحی سے قبل انہیں اس بات کا کوئی اندازہ نہیں تھا کہ اپینڈکس اتنا طویل ہو سکتا ہے۔
ڈاکٹر کا مزید کہنا ہے کہ اس اپینڈکس کو پوری طرح سنبھال کر رکھا جائے گا جو طبی تعلیم حاصل کرنے والے طلبہ کے لئے کافی کارآمد ثابت ہوگا۔ مریضہ کے بارے میں انہوں نے کہا کہ جراحی کے بعد مریضہ کی حالت مستحکم ہے اور اسے اسپتال سے رخصت کر دیا گیا ہے۔
